Raosaheb Danve : नातवामुळे आजोबा रावसाहेब दानवे अडचणीत, 10 कोटी रुपयांच्या फसवणुकीचा गुन्हा ; भाजप नेत्यानेच केली तक्रार

Nashik Crime News : माजी केंद्रीय मंत्री आणि भाजप नेते रावसाहेब दानवे यांचे नातू शिवम पाटील यांच्यासह आठ जणांविरुद्ध नाशिकच्या सातपूर पोलिस ठाण्यात तब्बल 10 कोटी रुपयांच्या फसवणुकीचा गुन्हा दाखल करण्यात आला आहे. विशेष म्हणजे तक्रार करणारे भाजपचेच पदाधिकारी असून उद्योजक कैलास अहिरे, असे तक्रारदाराचे नाव आहे.

कंपनीच्या शेअर्समध्ये भागीदारी करण्यापोटी देण्यात येणाऱ्या रकमेपैकी सुमारे दहा कोटींची रक्कम न देताच कंपनीचे शेअर्स परस्पर नावावर करून घेत सातपूरमधील उद्योजक कैलास अहिरे यांची सुमारे दहा कोटींची फसवणूक केल्याप्रकरणी हा गुन्हा दाखल झाला आहे. सातपूर पोलिस या गुन्ह्याचा अधिक तपास करत आहेत.

नेमकं प्रकरण काय?

तक्रारदार उद्योजक कैलास अहिरे यांनी दिलेल्या तक्रारीनुसार, सातपूर औद्योगिक वसाहतीत उद्योजक कैलास अहिरे यांची एन. व्ही. ऑटो स्पेअर्स प्रायव्हेट लिमिटेड ही कंपनी आहे. काही वर्षांपूर्वी कैलास अहिरे यांची माजी मंत्री दानवे यांच्यासोबत मुंबई येथे भेट झाली असता, दानवे यांनी फिर्यादी अहिरे यांच्याकडे कंपनीबद्दल चौकशी केली व माझा नातू शिवम पाटील, गिरीश पवार व सतीश अग्रवाल यांना कंपनीचे भागीदार करून घ्या, मी कंपनीचा टर्नओव्हर वाढवून देतो, रेल्वेची मोठ-मोठी कामे देतो असे आमिष दाखविले.(Nashik News)

त्यानंतर अहिरे यांनी त्यांच्या कंपनीत माजी केंद्रीय मंत्री रावसाहेब दानवे यांच्या सांगण्यावरून त्यांचा नातू शिवम पाटील आणि इतर काही जणांना भागीदारी दिली. कैलास आहेर यांनी 14 टक्के कंपनीचे शेअर्स दानवे यांच्या सूचनेनुसार शिवम पाटील व त्यांच्या सहकाऱ्यांना दिले. या शेअर्सच्या बदल्यात 25 कोटी रुपयांचा व्यवहार ठरला होता. मात्र, त्यापैकी 10 कोटी रुपयांची रक्कम देण्यात आली नाही, असा गंभीर आरोप तक्रारदाराने केला आहे.

कैलास अहिरे म्हणाले की, इतका मोठा माणूस सांगतोय म्हणून मी विश्वास ठेवला. यामुळे माझ्या कंपनीत अजून लोकांना रोजगार मिळेल असा विचार केला. त्याप्रमाणे मी त्यांना होकार दिला. मात्र नंतर माझी फसवणूक झाली . माजी खासदार रावसाहेब दानवे यांचे साथीदार गिरीश नारायण पवार आणि टीमने माझी फसवणूक केल्याचे अहिरे म्हणाले.