Nashik News : राज ठाकरे, जितेंद्र आव्हाडांना आवर घालण्यासाठी नाशिकचे साधू-महंत एकवटले, केली मोठी मागणी

Maharashtra Politics : धर्माविषयी अधिकार नसताना बेताल वक्तव्य करणाऱ्या मनसेप्रमुख राज ठाकरे व शरद पवार यांच्या राष्ट्रवादीचे आमदार जितेंद्र आव्हाड यांच्यासारख्यांवर बंदी आणण्यात यावी. अशा नेत्यांना आवर घालण्यासाठी कायदा करण्यात यावा अशा मागणीचा ठराव नाशिक मध्ये झालेल्या अखिल भारतीय संत समितीच्या बैठकीत करण्यात आला आहे.

प्रयागराज येथील कुंभमेळ्याची सांगता झाल्यानंतर आता नाशिकमध्ये 2027 मध्ये कुंभमेळा होणार आहे. त्या पार्श्वभूमीवर नाशिकमध्ये नुकतीच अखिल भारतीय संत समितीची बैठक झाली. या बैठकीला साधू-महंतानी विविध ठराव मांडले. त्यात संपूर्ण देशात गोहत्या बंदी कायदा लागू करावा, कुंभमेळ्याच्या पार्श्वभूमीवर साधू संतांची राहण्याची व्यवस्था, सुरक्षा, शाही स्नानामृत स्नान, राजमार्ग याचे नियोजन करण्यात यावे. कुंभमेळा प्राधिकरणामध्ये साधू संतांचा समावेश करण्यात यावा, असेही ठराव यावेळी करण्यात आले.

पंचवटीतील जनार्दन स्वामी मठात शनिवारी ही बैठक पार पडली. या बैठकीत राज ठाकरे, जितेंद्र आव्हाड यांच्याविरोधात साधू- महंत एकवटल्याचे पाहायला मिळाले. यावेळी दिगंबर आखाड्याचे रामकिशोरदासशास्त्री महाराज, महामंत्री स्वामी भारतानंद सरस्वती, संत समितीचे प्रदेश प्रमुख महंत अनिकेतशास्त्री देशपांडे, महंत सुधीरदास पुजारी, आखाडा परिषदेचे भक्तीचरण दास महाराज आदी या बैठकीला उपस्थित होते.

राज ठाकरे, जितेंद्र आव्हाड यांचा धर्मावर कोणताही अधिकार नाही. धर्मशास्त्राचे ते पंडित नाही. ते धर्मशास्त्रावर बोलतात. समाजविघातक व्याख्या करतात. त्यांच्यावर बंदी आणावी. याबाबत कायदा महाराष्ट्र सरकारने लागू करावा. असा ठराव बैठकीत मांडण्यात आल्याची माहिती महंत अनिकेत शास्त्री यांनी दिली आहे.

आगामी सिंहस्थ कुंभमेळ्याआधी गोदावरी आणि तिच्या उपनद्यांचे शुध्दीकरण होणे आवश्यक आहे. तसेच त्र्यंबकेश्वरला तीर्थक्षेत्राचा अ दर्जा मिळाला आहे, त्याप्रमाणे नाशिकलाही 'अ' वर्ग तीर्थस्थळाचा दर्जा देण्याची मागणी महंत सुधीरदास यांनी केली. कुंभमेळा नियोजनात, प्राधिकरणात धर्माचार्य आणि तीर्थ पुरोहितांना स्थान देण्याचा मुद्दा त्यांनी मांडला.