ठासून सांगा `आपण सर्व गांधीदूत`

नाशिक : आज गांधीजींच्या (Mahatma Gandhi) देशात (India) महात्मा गांधीजींची हत्या करणाऱ्या नथुराम गोडसेच उदात्तीकरण करणारा चित्रपट ‘व्हाय आय किल्ड गांधी’ हा चित्रपट प्रदर्शित होत आहे. हा चित्रपट प्रदर्शित होऊ नये. आज आपण सर्वांनी ‘आपण सर्व गांधीदूत आहोत, हे ठासून सांगण्याची गरज आहे, असे मत काँग्रेस (Congress) पक्षाचे शहराध्यक्ष शरद आहेर यांनी व्यक्त केले.

ते म्हणाले, महात्मा गांधीजींच्या विचारांनी संपूर्ण जग प्रभावित झाले आहे. आपल्या देशाची ओळख महात्मा गांधीजींच्या नावाने होते. सत्य-अहिंसा- सत्याग्रह या शस्त्रांचा वापर करून जग जिंकता येते, हे त्यांनी आपल्या लढ्यातून दाखवून दिले आहे. त्यांच्या पुण्यतिथीचा दिवस सलोखा-अहिंसा व शांतता दिवस म्हणून पाळला जातो; पण काही भरकटलेले व स्वार्थी लोक समाजाला भ्रमित करू पहात आहेत.

काँग्रेस या चित्रपटाविरोधात आक्रमक झाली असून, त्यावर बंदी आणण्याची मागणी केली आहे. महात्मा गांधी पुण्यतिथीनिमित्त महात्मा गांधी रस्त्यावरील काँग्रेस कमिटीत आदरांजली वाहण्यात आली. सेवा दलाचे अध्यक्ष डॉ. वसंत ठाकूर यांनी प्रास्ताविक केले. अध्यक्षीय भाषणात महाराष्ट्र प्रदेश काँग्रेस कमिटीचे उपाध्यक्ष व नाशिक शहर (जिल्हा) काँग्रेसचे अध्यक्ष श्री. आहेर यांनी या चित्रपटाच्या प्रदर्शनास काँग्रेसचा विरोध असून, त्याच्या प्रदर्शनाबाबत सामूहिक निषेध करीत असल्याचे सांगितले.

यावेळी श्री. आहेर यांच्यासह माजी मंत्री डॉ. शोभा बच्छाव, सेवा दलाचे शहराध्यक्ष अध्यक्ष डॉ. वसंत ठाकूर, आर. आर. पाटील, अल्पसंख्याक शाखेचे अध्यक्ष हनिफ बशीर, युवक शाखेचे अध्यक्ष स्वप्नील पाटील, माजी नगरसेवक लक्ष्मण धोत्रे, ब्लॉक अध्यक्ष नीलेश (बबलू) खैरे, अण्णा मोरे, गौरव सोनार, सुवर्णा गटकळ, निशिकांत कदम, राजकुमार जेफ, दाऊद शेख, दर्शन पाटील, सोमनाथ मोहिते आदी पदाधिकाऱ्यांसह कार्यकर्ते मोठ्या संख्येने उपस्थित होते.

---