Rohit Pawar : सयाजी शिंदेंना रोहित पवारांची साथ, नाशिकमधील वृक्षतोडीवरुन गिरीश महाजनांना घेरलं..

Nashik Kumbh Mela : नाशिक येथील कुंभमेळा जवळ आल्याने सध्या प्रशासनाकडून जोरदार तयारी केली जात आहे. मंत्री गिरीश महाजन हे कुंभमेळा मंत्री असल्याने सर्व निर्णय तेच घेत आहेत. पण महाजनांच्या एका निर्णयामुळे मोठा वाद निर्माण झाला आहे.

साधू-महंतांसाठी उभारण्यात येणाऱ्या साधूग्रामकरिता तपोवनातील तब्बल १८०० झाडे तोडण्यात येणार आहेत. याबाबत महापालिकेने नोटीस दिल्यानंतर पर्यावरणप्रेमेंनी झाडे वाचविण्यासाठी आंदोलन सुरु केलं. त्यात मंत्री गिरीश महाजन यांनी आपली भूमिका मांडली. त्यामुळे आणखीनच वाद वाढला.

साधुग्रामची जागा ही कुंभमेळ्यासाठी राखीव आहे. आपल्याकडे दुसरी जागा नसल्याने झाडे तोडावीच लागतील. एक झाड तोडलं तर त्या बदल्यात दहा वृक्ष लावू असं मंत्री महाजन यांनी म्हटलं होतं. गिरीश महाजन यांच्या या भूमिकेवर सह्याद्री देवराई प्रकल्पाचे प्रमुख व अभिनेते सयाजी शिंदे यांनी संताप व्यक्त केला होता. कुंभमेळ्यासाठी एकही वृक्ष तोड देणार नाही अशी भूमिका त्यांनी घेतली आहे.

एक झाड तोडून दहा झाडे लावू हे तर अतिशय फालतू विधान आहे या भाषेत सयाजी शिंदे यांनी मंत्री महाजन यांच्या विधानाचा समाचार घेतला होता. हुकुमशाही आहे की, लोकशाही असा सवालच सयाजी शिंदे यांनी उपस्थित केला. १०० जणाचं बलिदान देऊ पण नाशिकमध्ये एकही जाड तोडू देणार नाही असं त्यांनी ठणकावून सांगितलं.

सयाजी शिंदे यांना आता राष्ट्रवादी शरदचंद्र पवार पक्षाचे आमदार रोहित पवार यांची साथ मिळाल्याचे दिसते. कारण रोहित पवार यांनीही या प्रकरणात उडी घेतली आहे. त्यांनी एक्सपोस्ट करत भाजपवर निशाणा साधला आहे.

रोहित पवारांनी म्हटलं आहे की, प्रभू श्रीरामचंद्रांनी वनवासात असताना ज्या तपोवनातील वृक्षांची फळं खाऊन गुजराण केली त्याच नाशिकच्या तपोवनातील तब्बल १८०० झाडांवर हे सरकार कुऱ्हाड चालवायला निघालंय. तपोवनातील झाडं आणि त्यांचा हा ऐतिहासिक संदर्भ भाजपला माहित नाही का? मुळात जे साधू जंगलात राहून तपश्चर्या करतात त्यांच्याच सोयीच्या नावाखाखाली तपोवनातील जागेबाबत भाजपला काही छुपा अजेंडा रेटायचाय का, हे पहावं लागेल. सामान्य नागरिक आणि पर्यावरणप्रेमीच काय तर खुद्द साधूंनाही आणि प्रभूश्रीरामचंद्रांनाही ही वृक्षतोड मान्य होणार नाही. आमचा त्याला कडाडून विरोध असेल.