'...तर राज्यातील जनता ॲड. गुणरत्न सदावर्तेंना डोक्यावर घेऊन नाचेल'

जळगाव : राज्य परिवहन महामंडळ (एसटी) कामगार संघटनेचे नेते हे वकील आहेत. त्यांना सर्व परिस्थिती माहित आहे. त्यांनी एसटी कामगारांच्या डोक्यातील संभ्रम काढून त्यांना कामावर पाठवावे, असे माझे त्यांना आवाहन आहे. त्यांनी संपावर तोडगा काढून कामगारांना कामावर पाठवले, तर राज्यातील जनता त्यांना डोक्यावर घेऊन नाचेल, असे राज्याचे पाणी पुरवठा मंत्री आणि शिवसेना नेते गुलाबराव पाटील (Gulabrao Patil) यांनी एसटी कामगारांच्या संपावर तोडणा काढण्यासाठी ॲड. गुणरत्न सदावर्ते (Adv. Gunaratna Sadavarte) यांनी पुढाकार घ्यावा, अशी अपेक्षा व्यक्त केली. (Send ST workers to work : Gulabrao Patil's Appeal to Adv. Gunaratna Sadavarte)

राज्यातील एसटी कामगार गेल्या दिवाळीपासून राज्य सरकारमध्ये विलिनीकरणाच्या मागणीसाठी संपावर आहेत. ॲड गुणरत्न सदावर्ते यांच्या नेतृत्वाखाली न्यालयालयात हा लढा लढला जात आहे. सरकारने पगारवाढ करूनही कामगार संपावर येत नसल्याने राज्याचे उपमुख्यमंत्री अजित पवार यांनी ‘एसटी कामगारांनी ३१ मार्चपर्यंत संप मागे घेऊन कामावर यावे,’ असे आवाहन केले होते. त्याबाबत जळगावचे पालकमंत्री पाटील बोलत होते.

पाणी पुरवठा मंत्री गुलाबराव पाटील म्हणाले की, एसटी कामगार संपाचा आता अतिरेक होतो आहे. राज्यातील शाळेत जाणाऱ्या मुली आणि शेतकरी बांधव हे तुमचेच आहेत. त्यांच्या अडचणी तुम्ही समजून घेतल्या पाहिजेत. राज्य सरकार तुम्हाला कामावर येण्याचे आवाहन करत आहे. तुमच्याशी चर्चा करत आहे. न्यायालयाचा आणि समितीचा निर्णय झाला आहे, त्यामुळे आतातरी कामगारांनी विचार करावा. कामगारांनी आपली मागणी कायम ठेवत कामावर यावे. हिंदू धर्माचा पवित्र सण असलेल्या गुढीपाडव्याच्या दिवशी त्यांनी कामावर हजर व्हावे, अशी माझी त्यांना विनंती आहे.

कामगारांना घरदार आहे. कुटुंब आहे, याचाही त्यांनी विचार करावा. नेते त्यांना चुकीचा मार्ग दाखवित आहेत. आपल्या मागण्या मान्य होतील, या भावनेच्या भरात कामगारही त्यांच्या मागे जात आहेत. त्यांच्या या संपात काही हजार कामगार आहेत आणि त्यांच्यावर अवलंबून असणारे लोकही मोठ्या संख्येने आहेत, याचा विचार त्यांनी केला पाहिजे. आपल्या मागण्या त्यांनी लावून धरल्या पाहिजेत. पण, त्यांनी आता कामगारांच्या डोक्यात असलेला संभ्रम काढून कामगारांना कामावर हजर व्हावे, असे सांगितले पाहिजे, अशी मागची अपेक्षा आहे, असेही गुलाबराव पाटील यांनी सांगितले.