Ram Shinde On Sharad Pawar: '' शरद पवारांनीच सर्वात पहिल्यांदा शिवसेना फोडली!''; भाजप नेत्याचा खळबळजनक आरोप

Bjp - Shivsena - Ncp News : शिवसेनेतील एकनाथ शिंदे व आणि ४० आमदारांच्या बंडखोरीमागे भाजप असल्याचा आरोप नेहमीच ठाकरे गटाकडून करण्यात येत असतो. तसेच भाजपनेच शिवसेना फोडली अशी टीकाही केली जाते. या टीकेला भाजपकडून प्रत्युत्तरही दिले जाते.मात्र, आता भाजप नेते व आमदार राम शिंदे यांनी राज्यात शरद पवारांनीच सर्वात पहिल्यांदा शिवसेना फोडल्याचा गंभीर आरोप केला आहे.

भाजपाचे नेते राम शिंदे यांनी माध्यमांशी संवाद साधला. यावेळी ते बोलत होते. शिंदे म्हणाले, या राज्यात शरद पवारांनी पहिल्यांदा शिवसेना फोडण्याचं काम केलं. आजतागायत छगन भुजबळ हे पूर्वाश्रमीचे शिवसेनेचे आहेत आणि आज ते राष्ट्रवादी काँग्रेसचे नेते आहेत. संजय राऊत सकाळ-दुपार-संध्याकाळ फडफड बोलतात. मात्र, त्यांनी शिवसेनेला पहिल्यांदा कोणी फोडण्याचा प्रयत्न केला आणि कोणी शिवसेना फोडली यावरही बोलायला हवं असंही राम शिंदे (Ram Shinde) यावेळी म्हणाले.

संजय राऊत महाराष्ट्राच्या राजकारणातील शकुनी मामा असून त्यांनी सकाळ-दुपार-संध्याकाळ बोलून शिवसेनेचा कार्यक्रम केला. ते शिवसेनेत राहून राष्ट्रवादी काँग्रेस व शरद पवारां(Sharad Pawar)चं काम करत आहेत. त्यामुळे शिवसेनेची दुर्दशा झाली आहे. यातून त्यांच्या बौद्धिक क्षमतेची लक्तरे उडाली आहेत. हे संपूर्ण महाराष्ट्राची जनता पाहत आहे अशा शब्दांत आमदार राम शिंदे यांनी राऊतांवर हल्लाबोल केला आहे.

अमित शाह(Amit Shah) हे राष्ट्रीय नेते असून ते देशाचे गृहमंत्री आहेत. ते राज्याच्या दौऱ्यावर आले असताना त्यांच्याबद्दल अशा पद्धतीचं वक्तव्य करणं संजय राऊतांचं काम राहिलेलं नाही. त्यांच्यावर कोणीही विश्वास ठेवायला तयार नाही. ते जे बोलत आहेत त्याला कुठलाही आधार नाही. त्यामुळे राऊतांच्या टीकेला भाजप कधीही गांभीर्यांने घेत नाही असंही शिंदेंनी यावेळी सांगितले.