Chandrakant Patil Accident: मोठी बातमी! शिंदे गटाचे आमदार चंद्रकांत पाटलांच्या गाडीचा अपघात

Chandrakant Patil Accident: शिवसेना (Shivsena) एकनाथ शिंदे गटाचे मुक्ताईनगरचे आमदार चंद्रकांत पाटील (MLA Chandrakant Patil) यांच्या गाडीला आज (1 एप्रिल) रोजी दुपारी अपघात झाला आहे. या अपघातामध्ये आमदार पाटील यांना किरकोळ दुखापत झाली असून, त्यांच्यावर सध्या खासगी रुग्णालयात उपचार सुरू आहेत. हा अपघात सोमवारी दुपारी मुक्ताईनगर (Muktainagar) तालुक्यातील जुना कुंड रस्त्यावर घडला. धक्कादायक बाब म्हणजे, चंद्रकांत पाटील यांच्याच ताफ्यातील पोलिसांच्या गाड्या एकमेकांवर आदळल्याने हा अपघात झाल्याचं सांगितलं जात आहे.

या अपघातामध्ये आमदार चंद्रकांत पाटील (MLA Chandrakant Patil) यांच्यासह ताफ्यातील पोलिसांच्या (Police) गाड्यांमधील 3 पोलिस कर्मचारी जखमी झाले आहेत, तर आमदार पाटील यांनाही किरकोळ दुखापत झाली आहे. हा अपघात नेमका कशामुळे झाला, याबाबतची माहिती खुद्द आमदार पाटील यांनी दिली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

माध्यमांशी बोलताना पाटील म्हणाले, मुक्ताई नगरवरून जुना कुंड रस्त्याने जात असताना काही शेतकरी (Farmer) आमच्यासाठी रस्त्यावर थांबले होते. शेतकऱ्यांना पाहून चालकाला गाडी थांबवायला सांगितली. या वेळी आमची गाडी रस्त्यावर थांबली असतानाच आमच्याच ताफ्यातील सुरक्षारक्षकांच्या गाडीचा ब्रेक न लागल्याने ती आमच्या कारवर जोरात आदळली. यामध्ये माझ्यासह 3 पोलिस कर्चमाऱ्यांना दुखापत झाली असून, त्यांच्यावर सध्या मुक्ताईनगरमधील खासगी रुग्णालयात उपचार सुरू असल्याची माहिती पाटील यांनी दिली.

या अपघातात (Accident) चंद्रकांत पाटलांच्या ताफ्यातील एक पोलिस गाडी भरधाव वेगाने दुसऱ्या गाडीवर आदळल्याने हा अपघात झाला. या अपघातात पोलिसांच्या गाडीच्या बोनेटचं नुकसान झालं आहे. सुदैवाने या दुर्घटनेत कोणतीही जीवितहानी झालेली नाही. आमदार चंद्रकांत पाटील यांना किरकोळ दुखापत झाली असली तरी त्यांची प्रकृती चांगली असल्याची माहिती समोर आली आहे.

(Edited By Jagdish Patil)

R