अनेक सभा घेऊनही निवडणुकीत राज ठाकरेंचे गुणपत्रक कोरेच ; गुलाबराव पाटलांचा टोला

जळगाव : "सभा घेणं हा राज ठाकरे (Raj Thackeray) यांचा छंद आहे,मात्र त्या सभेचा त्यांना कोणताही फायदा होत नाही, ते केवळ एजंट म्हणून काम करतात," असा टोला शिवसेना नेते राज्याचे पाणी पुरवठा मंत्री गुलाबराव पाटील (Gulabrao Patil) यांनी लगावला आहे. जळगाव येथे पत्रकारांशी ते बोलत होते.

राज ठाकरे यांच्या औरंगाबाद येथील सभेबाबत बोलताना गुलाबराव पाटील म्हणाले, "राज ठाकरे यांना सभा घेण्याचा छंद आहे, मात्र त्यांना यश मिळत नाही,अभ्यास करून परीक्षेत चांगले गुण पडले तर त्या अभ्यासला अर्थ आहे, अनेक सभा घेऊनही निवडणुकीत त्यांचे गुणपत्रक कोरेच असते, त्यांच्याकडे एकही पालिका नाही,त्यांचा केवळ एक आमदार आहे. त्यामुळे त्यांच्या सभेने काहीही फरक पडणार नाही. त्यांचे अकाऊंट कोरेच आहे बिना पैशाचे अकाउंट दाखविण्यात काहीही अर्थ नाही,जनतेने त्यांना यश दिले पाहिजे,"

"राज ठाकरे हे कोणाचे तरी एजंट म्हणून काम करतात,ते आता कोणाचे एजंट आहेत सर्व जनतेला माहीत आहे, दर पाच वर्षांनी त्यांची भूमिका बदलत असते.पहिली भूमिका काय? पक्ष स्थापनेची भूमिका काय ? झेंड्याची भूमिका काय ? आता तर झेंड्यात इंजन घुसले आहे. स्वतःच्या पक्षाची भूमिका बद्दलवितो त्या माणसाला यश मिळत नाही,ते मिळविण्यासाठी त्यांचा हा खटाटोप सुरू आहे," असा हल्लाबोल गुलाबराव पाटलांनी केला.

हजारों कार्यकर्त्यांसह राज ठाकरे हे आज औरंगाबाद येथील सभेसाठी रवाना झाले आहेत. पुण्यात त्यांच्या गाडीवर पुष्पवृष्टी करण्यात आली. मशिदीवरील भोंगे उतरविण्याचा इशारा राज ठाकरे यांनी दिला आहे.या पार्श्वभूमीवर राज ठाकरे यांच्या औरंगाबाद येथील सभेनंतर काही गुन्हे दाखल झाले तर मनसैनिकांना संरक्षण देण्यासाठी दोन हजार वकीलांची फौज तयार असल्याचे सुत्रांनी सांगितले.

तीन मेला होणाऱ्या महाआरतीसाठी मनसेकडून वकील नेमण्यात आले आहेत.औरंगाबादला रवाना होण्याआधी पुण्यात आज सकाळी त्यांच्या राजमहाल या निवासस्थानी गुरुजींच्या माध्यमातून मंत्रोच्चारासह आशीर्वाद असा धार्मिक कार्यक्रम झाला.