Shivsena news; पक्षप्रमुख उद्धव ठाकरे लवकरच नाशिकच्या मैदानात

नाशिक : राज्यात (Maharashtra) महाविकास आघाडीचे (Mahavikas Aghadi) सरकार सत्तेतून पायउतार झाल्यानंतर मुख्यमंत्रिपदाचा राजीनामा दिलेले शिवसेनेचे (Shivsena) पक्षप्रमुख उद्धव ठाकरे (Uddhav Thackrey) जानेवारी महिन्याच्या अखेरीस किंवा फेब्रुवारी महिन्याच्या पहिल्या आठवड्यात नाशिकमध्ये (Nashik) येत आहे. ठाकरे यांच्या बैठकीत पक्ष संघटना बळकट करण्याबरोबरच नवीन नियुक्त्यांची शक्यता आहे. (Uddhav Thackrey will be on Nashik visit in the current month)

जून महिन्यात राज्यात महाविकास आघाडीचे सरकार कोसळले. एकनाथ शिंदे यांनी ४० आमदारांसह भाजपसोबत घरोबा करताना सत्तादेखील स्थापन केली. त्यानंतर एकनाथ शिंदे व उद्धव ठाकरे असा सरळसरळ सामना रंगला.

राज्यात सरकार स्थापन झाल्यानंतर शिंदे यांनी उद्धव बाळासाहेब ठाकरे शिवसेनेला कात्रजचा घाट दाखवण्याची भूमिका घेतली. संघटनेच्या चिन्हावरच त्यांनी दावा केल्यानंतर वाद टोकाला गेला. शिवसेनेचे बालेकिल्ले असलेल्या मुंबई, ठाणे नाशिक व औरंगाबाद या प्रमुख शहरांकडे मुख्यमंत्री शिंदे यांनी लक्ष केंद्रित केले. उद्धव ठाकरे यांनी आतापर्यंत मुंबई सोडलेली नाही. मात्र, आता नववर्षाचे निमित्त साधून ते पक्षाच्या बालेकिल्ल्याची डागडुजी करण्यासाठी मैदानात उतरत आहे.

त्याच अनुषंगाने नाशिकमध्ये संघटना बळकटीसाठी जानेवारी महिन्याच्या अखेरीस किंवा फेब्रुवारी महिन्याच्या पहिल्या आठवड्यात त्यांनी नाशिकमध्ये दोन दिवसाचे नियोजन केले आहे. शिवसेनेच्या प्रमुख पदाधिकाऱ्यांनी बुधवारी (ता. ४) मातोश्री निवासस्थानी उद्धव ठाकरे यांची भेट घेतली. या वेळी त्यांनी नाशिकला येणार असल्याचे सांगितले. अशी माहिती महानगरप्रमुख सुधाकर बडगुजर यांनी दिली.