MLA Suhas Kande : राजकारणात शब्दाला किंमत! एकमेव नगरसेवक असूनही भाजपसाठी सुहास कांदेंचा मोठा निर्णय

Nashik Politics : मनमाड नगरपरिषद निवडणुकीत भाजपसोबत युती करण्यासाठी शिवसेनेकडून आमदार सुहास कांदे व राष्ट्रवादीकडून समीर भुजबळ या दोघांनी फील्डींग लावली होती. परंतु अखेरीस भाजपने येथे सुहास कांदे यांना साथ देत शिवसेनेसोबत युती केली होती. मनमाड नगरपरिषदेवर शिवसेनेचा भगवा फडकला. सुहास कांदे यांचे समर्थक योगेश पाटील नगराध्यक्ष झाले.

भाजपला दिलेला शब्द पाळत व युती धर्माचे पालन करत आमदार कांदे यांनी भाजपसाठी मोठा निर्णय घेतला आहे. मनमाड नगरपरिषद निवडणुकीत भाजपचा एकमेव नगरसेवक असतानाही आमदार कांदे यांनी भाजपला उपनगराध्यक्षपद दिले आहे. उपनगराध्यक्षपदी भाजपचे मुकुंद एळींजे तर स्वीकृत नगरसेवकपदी शिवसेनेचे शहरप्रमुख मयूर बोरसे यांची बिनविरोध निवड करण्यात आली आहे.

मनमाड नगरपरिषदेच्या निवडणुकीत नांदगावप्रमाणेच सुहास कांदे यांनी त्यांचे वर्चस्व दाखवून दिले. शिवसेनेच्या तब्बल २१ जागा त्यांनी निवडून आणल्या. त्यात भाजपचा १ व रिपाईचे २ असे सुरुवातील २४ नगरसेवक कांदे गटाकडे होते. दरम्यान काँग्रेसच्या एका व एका अपक्ष नगरसेवकाने शिवसेनेत प्रवेश केल्याने सत्ताधारी कांदे गटाचे संख्याबळ २६ झाले आहे.

दरम्यान विरोधी बाकांवरील शिवसेना उद्धव बाळासाहेब ठाकरे पक्षाचे ४ व राष्ट्रवादी काँग्रेस अजित पवार पक्षाचा केवळ १ नगरसेवक आहे. सुहास कांदे यांनी या निवडणुकीत विरोधकांचा पुरता धुव्वा उडवलेला दिसतो. समीर भुजबळ यांचे भाजपसोबत युती करण्याचे प्रयत्न सुरु असतानाच दुसरीकडे कांदे यांनी जादूची कांडी फिरवत भाजपसोबत युतीची घोषणाही करुन टाकली होती. भाजपला सोबत घेऊन कांदेंनी नगरपालिकेवर शिवसेनेचा फगवा फडकवला.

या निवडणुकीत भाजपचा केवळ एकच नगरसेवक निवडून आला. प्रभाग क्रमांक ४ अ मधील अनुसूचित जातीसाठी राखीव जागेवरून निवडून आलेले भाजपचे एकमेव नगरसेवक मुकुंद एळींजे आहेत. बौद्ध समाजातील नवखा चेहरा असलेले मुकुंद एळींजे पहिल्यांदाच नगरसेवक म्हणून निवडून आले असून, पहिल्याच टर्ममध्ये त्यांना आमदार कांदे यांनी उपनगराध्यक्षपदाची संधी दिली. नगरपालिकेच्या डॉ. बाबासाहेब आंबेडकर सभागृहात झालेल्या विशेष सभेत उपनगराध्यक्षपदासाठी जिल्हाधिकाऱ्यांकडे दाखल झालेल्या एकमेव नामनिर्देशन अर्जानुसार भाजपचे मुकुंद एळींजे यांची निवड जाहीर करण्यात आली.