Sujay Vikhe : बापावरून जयश्री थोरात कडाडल्या, सुजय विखेंनींही कडक शब्दांत सुनावलं; म्हणाले, "ताई ओ ताई...”

Sangamner News: खबरदार...! माझ्या बापाविषयी बोलाल, तर. संगमनेर तालुक्याकडे वाकड्या नजरेनं बघायचं नाही, असा दम काँग्रेसचे ज्येष्ठ नेते, बाळासाहेब थोरात यांच्या कन्या जयश्री थोरात यांनी माजी खासदार सुजय विखे-पाटील यांना भरला होता. यानिमित्तानं थोरात आणि विखे-पाटील यांची तिसरी पिढीतही कलगीतुऱ्याला सुरूवात झाली. जयश्री थोरात यांनी दम भरल्यानंतर सुजय विखे-पाटील यांनीही जशास-तसं प्रत्युत्तर दिलं आहे. ते एका मेळाव्याला संबोधित करत होते.

सुजय विखे ( Sujay Vikhe ) म्हणाले, “ताई.. ओ.. ताई... मी तुमच्या वडिलांबद्दल काहीच बोललो नाही. मी आमदारांची कार्यपद्धत, निष्क्रियतेबद्दल बोललो. 40 वर्षांपासून जो आमदार गोरगरीब जनतेच्या आयुष्याशी खेळ करत राहिला, त्याच्याबद्दल बोललो. एखादा माणूस गोरगरीबांचं रक्त पित असेल, तर त्याविरुद्ध विखे-पाटील सदैव उभा राहिल.”

“लोकशाहीत तुम्ही आम्हाला बोलायचं थांबवू शकत नाही. ताई... ओ.. ताई.. जरा ऐकायला शिका. वर्षानुवर्षे तुम्ही लोकांची तोंड दाबून ठेवले. आज हा संगमनेर तालुका गप्प बसणार नाही. तुम्ही कानात जरी कापसाचे बोळे घालते, तर आवाज तुमच्या घरापर्यंत पोहोचल्याशिवाय राहणार नाही. ही परिवर्तनाची नांदी आहे. संगमनेरमधील प्रस्थापितांचा तख्ता पलटकेल्याशिवाय थांबणार नाही,” असं आव्हान सुजय विखे यांनी दिलं.

“जनता ही मायबाप असते. संगमनेर तालुक्यात इतिहास पहिल्यांदा येथील राजकन्या म्हणतात, येथील जनता नाही, आमदार बाप आहे. तुम्ही गोरगरीब जनतेचा बाप काढायला निघाला आहात. हे कदापीही सहन होणार नाही. ताई.. ओ.. ताई 20 नोव्हेंबरला संगमनेरची जनता दाखवून देईल तालुक्याचा बाप जनता आहे की आमदार,” असा इशाराही विखे-पाटील यांनी दिला आहे.