Tipu Sultan Photo Controversy : टिपू सुलतान फोटो वाद थेट हायकोर्टात! राज्य सरकारला नोटीस, हिंदुत्ववादी संघटनांची कोंडी?

Tipu Sultan News: समाजवादी पक्षाच्या उपमहापौर शान-ए-हिंद यांनी आपल्या शासकीय कार्यालयात टिपू सुलतान यांची प्रतिमा लावली होती. ही प्रतिमा नागरिकांनी त्यांना भेट दिली होती. प्रतिमा कार्यालयात लावल्याने हिंदुत्ववादी संघटनांनी त्यांच्या विरोधात रान पेटवले होते.

यासंदर्भात मालेगाव महापालिका प्रशासनाने ही प्रतिमा काढून टाकण्याचे आदेश दिले होते. यावरून सत्ताधारी आणि विरोधकांमध्ये चांगलाच वाद रंगला होता. हिंदुत्ववादी संघटनांच्या भूमिकेला समाजवादी पक्षाने आक्षेप घेतला होता.

मालेगाव महापालिकेतील सत्ताधारी इस्लाम पक्ष, समाजवादी पक्षाने देखील आक्रमक भूमिका घेत विरोधकांना प्रत्युत्तर दिले होते. आता विरोधक आणि प्रशासनाने घेतलेल्या भूमिकेला त्यांनी उच्च न्यायालयात आव्हान दिले होते.

या प्रश्नावर आता उच्च न्यायालयाने राज्य शासनाला नोटीस बजावली आहे. प्रशासनाने आपले उत्तर सादर करण्याचे आदेश दिले आहेत. त्यामुळे हिंदुत्ववादी संघटनांची भूमिका ही वादात सापडण्याची चिन्हे आहेत.

हिंदुत्ववादी संघटनांची कोंडी

महापौरांनी राज्यघटनेत टिपू सुलतान यांच्या प्रतिमेचा समावेश करण्यात आल्याचा मुद्दा पुढे केला आहे. राज्यघटनेत विविध राष्ट्र पुरुषांच्या प्रतिमांचा मूळ मसुद्यात समावेश आहे. त्यात प्रभू श्रीराम, छत्रपती शिवाजी महाराज यांच्यापासून तर टिपू सुलतान यांचाही समावेश आहे. टिपू सुलतान यांनी ब्रिटिशांविरुद्ध संघर्ष केला होता. त्यामुळे या प्रश्नावर राज्य शासन काय भूमिका घेते याची उत्सुकता लागली आहे. उपमहापौरांनी या प्रश्नावर राज्य शासनाबरोबरच हिंदुत्ववादी संघटनांची कोंडी केल्याने तो चर्चेचा विषय ठरला आहे. यात न्यायालय काय भूमिका घेते याची उत्सुकता आहे.