Shivsena UBT News: गेले काही दिवस नाशिकच्या पालकमंत्र्यांचा विषय सातत्याने चर्चेत आहे. विरोधकांनी यावर सातत्याने शासनालाावर घेरण्याचा प्रयत्न केला. पुन्हा एकदा शिवसेना उद्धव ठाकरे पक्षाने पालकमंत्र्यांचा विषय चर्चेत आणला आहे.
नाशिक शहरात २०२७ मध्ये सिंहस्थ कुंभमेळा होत आहे. जलसंपदा मंत्री गिरीश महाजन यांच्यावर सिंहस्थ कुंभमेळा मंत्री म्हणून जबाबदारी आहे. मात्र जिल्ह्याच्या पालकमंत्री पदाची रखडलेली नियुक्ती अद्यापही जाहीर झालेली नाही.
सिंहस्थ कुंभमेळ्याच्या आतापर्यंत दोन आढावा बैठका झाल्या. मुख्यमंत्री देवेंद्र फडणवीस यांनी स्वतःच याबाबत आढावा घेतला. त्यामध्ये जिल्ह्यातील चारही मंत्र्यांना दूर ठेवण्यात आले होते. त्यावरून राजकारण सुरू आहे.
नाशिक आणि रायगडचा पालकमंत्रीपदाचा तिढा गंभीर बनला आहे. नाशिकला गिरीश महाजन तर रायगड येथे आदिती तटकरे यांची नियुक्ती मुख्यमंत्र्यांनी जाहीर केली होती. मात्र शिवसेना एकनाथ शिंदे पक्षाने आक्षेप घेतल्याने या नियुक्त्यांना स्थगिती देण्यात आली होती.
आता शिवसेना उद्धव ठाकरे पक्षाने नाशिकच्या पालकमंत्री पदाचा प्रश्न उपस्थित केला आहे. यासंदर्भात खासदार राजाभाऊ वाजे, शिवसेनेचे उपनेते दत्ता गायकवाड, जिल्हाप्रमुख डी. जी. सूर्यवंशी, महानगर प्रमुख प्रथमेश गीते यांसह विविध पदाधिकारी आणि कार्यकर्त्यांनी सोमवारी जिल्हाधिकाऱ्यांची भेट घेतली. शहरातील वाढती गुन्हेगारी आणि सिंहस्थ कुंभमेळ्यातील विकास कामे यावर चर्चा झाली.
कुंभमेळा हा नाशिक शहराचा मोठा उत्सव आहे. त्या दृष्टीने हजारो कोटी रुपये त्याबाबत खर्च होणार आहेत. मात्र कुंभमेळ्यात पालकमंत्र्यांचे पद जाणीवपूर्वक रिक्त ठेवण्यात आले आहे का? कुंभमेळ्याच्या कामकाजात शासनाने आणि स्थानिक प्रशासनाने जिल्ह्यातील दोन्ही खासदार आणि आमदारांना अलिप्त का ठेवले? असा प्रश्न यावेळी उपस्थित करण्यात आला.
सिंहस्थ कुंभमेळ्याच्या निमित्ताने शहरातील सर्व घटक आणि नागरिकांना सहभागी करून घेणे आवश्यक आहे. असे असताना मुख्यमंत्री आणि गिरीश महाजन वगळता शासनाकडून अन्य कोणालाही याबाबत सहभागी केले जात नाही. शासनाने अद्यापही सिंहस्थ कुंभमेळ्याचा विकास आराखडा जाहीर केलेल्या नाही.
शिवसेना उद्धव ठाकरे पक्षाने पुन्हा एकदा पालकमंत्री पदाचा विषय उपस्थित केला आहे. छगन भुजबळ आणि दादा भुसे यांसह अन्यमंत्र्यांनीही पालकमंत्री पदासाठी इच्छुक असल्याचे संकेत यापूर्वी दिले आहे. या पार्श्वभूमीवर पालकमंत्रीपदाचे राजकारण पुन्हा एकदा चर्चेत आले आहे.
------
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.