दादा भुसे, सुहास कांदेंना नवे सरकार मंत्रीपद देणार का?

नाशिक : राज्यातील ठाकरे सरकार (Mahavikas Aghadi) कोसळल्यानंतर नव्या सरकारमध्ये देवेंद्र फडणवीस (Devendra Fadanvis) मुख्यमंत्रिपदाची, तर एकनाथ शिंदे (Eknath Shinde) उपमुख्यमंत्रिपदाची शपथ घेणार हे स्पष्ट आहे. यामध्ये दादा भुसे (Dada Bhuse) आणि सुहास कांदे (Suhas Kande) मंत्री होतील का? याची उत्सुकता आहे. (Whether Suhas kand & Dada Bhuse will get minstry in new Government)

शिवसेनेत उभी फूट पडल्याने त्याचा परिणाम आगामी महापालिका, जिल्हा परिषद आणि पालिकांच्या निवडणुकांवरदेखील होणार आहे. तत्पूर्वी, शिवसेनेच्या बंडखोर गटामधील कोणत्या नेत्यांना मंत्रिपदे मिळतील, हे पाहणे महत्त्वाचे ठरेल. उत्तर महाराष्ट्राचा विचार करता तब्बल सहा आमदार शिंदे गटासोबत सामील झालेले आहेत.

मंत्रिपदासाठीची रस्सीखेच पुढच्या काळात पाहायला मिळेल. बंडखोरांसह भाजपमधील काही आमदारांचीही वर्णी मंत्रिपदासाठी लागेल, हे निश्चित आहे. नाशिकच्या वाट्याला दोन, तर खानदेशच्या खात्यात तब्बल पाच मंत्रिपदे येण्याची शक्यता आहे.

मालेगाव बाह्यचे शिवसेनेचे बंडखोर आमदार आणि महाविकास आघाडी सरकारमधील कृषिमंत्री दादा भुसे कॅबिनेट दर्जाचे मंत्री नव्या सरकारमध्येही असतील. दादा भुसे सुरवातीपासून एकनाथ शिंदे यांचे खंदे समर्थक म्हणून ओळखले जातात, तर नांदगाव-मनमाड मतदारसंघाचे शिवसेना बंडखोर आमदार सुहास कांदे राज्यमंत्री बनण्याची दाट शक्यता आहे.

सुहास कांदे यांनी राष्ट्रवादीचे दिग्गज नेते छगन भुजबळ यांच्याविरुद्ध दंड थोपटल्यानंतर ते राज्यभर चर्चेत आले होते. त्यामुळे शिवसेना बंडखोरांपैकी या दोघांची वर्णी मंत्रिमंडळात लागणे जवळपास निश्चित मानले जात आहे. ज्या वेगवान घडामोडी राजकीय पटलावर होत आहेत, त्याहून वेगवान घडामोडी आता पुढच्या काही दिवसांमध्ये भाजपच्या अंतर्गत आणि त्यांना साथ देणाऱ्या आमदारांच्या गटात पाहायला मिळणार आहेत.

---