Bharat Jodo Yatra : राहुल गांधींना आवरला नाही भजी तळण्याचा मोह ; सोलापुरी जेवणाचा घेतला आस्वाद!

अकोला : काँग्रेसचे खासदार राहुल गांधी यांच्या नेतृत्वाखाली "भारत जोड़ो" यात्रा महाराष्ट्रात सुरु आहे. अकोला जिल्हा भारत जोड़ो पदयात्रेची जबाबदारी प्रदेश काँग्रेसने कार्याध्यक्षा आमदार प्रणिती शिंदे यांच्याकडे सोपविली होती. राहुल गांधी आणि काँग्रेस नेतेमंडळी यांच्या दुपारच्या जेवणाच्या मेजवानीचा बेत प्रणिती शिंदे यांनी अकोला जिल्ह्यातील पातूर ते बाळापुर मार्गावरील गजानन रोपवाटिका येथे आयोजीत केला होता.

सोलापुरचे असे काही खाद्यपदार्थ आहेत की, जे पाहताच कोणताही खवय्य्या स्वत:ला खाण्यापासून थांबवू शकणार नाही, असे विविध पदार्थ या जेवणाच्या मेजवानीत केले होते. त्यामध्ये मिर्ची चिरुन चिंच आणि इतर पदार्थ भरून केलेली खमंग गरमागरम आंध्र भजी, खुशखुशीत-चटपटीत धपाटे, दही सोबत झणझणीत शेंगा चटणी, सोलापुरची ख़ासियत असलेली ज्वारीची आणि बाजरीची कड़क भाकरी, पौष्टिक गव्हाची हुग्गी यासारखे स्वादिष्ट पदार्थ मेजवानीत होते. राहुल गांधी आणि उपस्थित नेतेमंडळीनी मनसोक्त सोलापूरी जेवणाचा आस्वाद घेतला. अतिशय चविष्ट पदार्थ होते असे राहुल गांधींनी कौतुक केले.

यावेळी राहुल गांधी यांनी सर्व पदार्थांची माहिती संबंधीत सोलापुरच्या स्वंयपाक केलेल्या महिला भगिनी कडून घेतली. तसेच भजी बनवत असताना बघून राहुलजीना भजी तळण्याचा मोह आवरता आहला नाही. स्वत: त्यांनी काही भजी तळले. त्यामुळे उपस्थितांना आश्चर्यचकीत झाले.

यानंतर राहुल गांधी यांनी भारत जोड़ो यात्रेमध्ये निष्ठेने काम केलेल्या प्रणिती शिंदे आणि सर्वांचे कौतुक केले. सोलापुरी खाद्यपदार्थ बनविण्याकरीता यल्लाप्पा तुपदोळकर, शांतकुमार बळगेरी, महानंदा रामपुरे, लक्ष्मी यादगिरी, पद्मिनी शेट्टीयार, समाधान हाके यांनी विशेष परिश्रम घेतले.