Video Chandrakant Patil: बच्चू कडू यांची नाराजी चंद्रकांतदादा दूर करणार का?

विधानसभा निवडणुकीच्या पार्श्वभूमीवर प्रहार संघटनेचे प्रमुख,आमदार बच्चू कडू (Bachchu Kadu) हे महायुतीतून बाहेर पडणार असल्याच्या बातम्या आल्यानंतर आता त्यांची समजूत काढण्यासाठी भाजपने कंबर कसली आहे. भाजपचे ज्येष्ठ नेते, मंत्री चंद्रकांत पाटील हे बच्चू कडू यांच्या अमरावतीच्या निवासस्थानी गेले आहे. बच्चू कडू यांची नाराजी दूर करण्यासाठी चंद्रकांत पाटील यांनी ही भेट घेतल्याचे बोलले जाते.

विधानसभा निवडणुकीत बच्चू कडू तिसरी आघाडी स्थापन करणार असल्याने महाराष्ट्राच्या राजकारणात मोठी उलथापालथ होणार शक्यता नाकारता येत नाही. या तिसऱ्या आघाडीचा फटका महायुती आणि आघाडीलाही बसू शकतो. त्यामुळे ज्येष्ठ नेतेमंडळी बच्चू कडू यांच्या संपर्कात आहे.

लोकसभा निवडणुकीपूर्वी राष्ट्रवादी काँग्रेस शरदचंद्र पवार पक्षाचे अध्यक्ष शरद पवार हे अमरावतीमध्ये बच्चू कडू यांच्या निवासस्थानी गेले होते. त्यानंतर काही दिवसापूर्वी पुण्यातील मोदी बागेत शरद पवार यांच्या निवासस्थानी बच्चू कडू यांनी त्यांची भेट घेतली होती. आज चंद्रकांत पाटलांनी कडू यांची भेट घेतल्याने बच्चू कडू यांच्या मनात नेमकं काय सुरु आहे, अशा चर्चा राजकीय वर्तुळात रंगू लागल्या आहेत.

विधानसभेच्या पार्श्वभूमीवर बच्चू कडू यांनी तिसऱ्या आघाडीची इच्छा व्यक्त केली आहे. स्वाभिमानी शेतकरी संघटनेचे राजू शेट्टी आणि एमआयएमचे इम्तियाज जलील यांची त्यांना साथ मिळणार असल्याचे समजते. राजू शेट्टी आणि इम्तियाज जलील यांनी राज्यात होणाऱ्या तिसऱ्या आघाडीत सहभागी होऊन महायुती आणि महाविकास आघाडीला पर्याय देणार असल्याचे स्पष्ट केले.

ही तिसरी आघाडी विधानसभेत राज्यातील भाजप प्रणीत महायुती आणि महाविकास आघाडीचे टेन्शन वाढणार हे मात्र निश्चित आहे. हे तीनही आक्रमक, लढाऊ नेत्यांनी एकत्र येत तिसरी आघाडी स्थापन केली तर ही महायुती अन् महाविकास आघाडीच्या नेत्याचे टेन्शन वाढवणार हे नक्की..

पुण्यात शरद पवार यांच्या भेटीनंतर विधानसभेला 'मविआ'सोबत जाणार का? या प्रश्नावर बच्चू कडू यांनी म्हटलं, "अजून तसे काही ठरलं नाही. 1 सप्टेंबरपर्यंत महायुती सरकारला 'अल्टिमेटम' दिला आहे. महायुतीत मी खूश असो किंवा नसो. शेतकरी, मजूरांचे प्रश्न महत्त्वाचे आहेत. त्यांच्या नाराजीचा सूर नेहमी आम्ही सरकारसमोर ठेवत असतो."