Congress Dynasty Politics : 'घराणेशाही'चा बोलबाला! मनपा निवडणुकीच्या तोंडावर अध्यक्षांनी पुत्रालाच केले 'प्रभारी'

Nagpur News : काँग्रेसमध्ये कुटुंबातीलच सदस्याला राजकीय वारसदार करण्याची परंपरा पूर्वापर चालत आली आहे. महापालिकेच्या निवडणुकीतही हे दिसून येत आहे. काँग्रेसचे शहर अध्यक्ष विकास ठाकरे हे महापौर होते. त्यानंतर ते आमदार झाले आहे. आता त्यांचे पुत्र केतन ठाकरे हे महापालिकेची निवडणूक लढणार आहेत.

उमेदवारांची निवड करण्यासाठी अध्यक्षांनी विधानसभानिहाय प्रभारी नियुक्त केले आहेत. यात केतन ठाकरे यांचाही समावेश आहे. त्यामुळे आता निवडणूक प्रभारी या नात्याने केतन ठाकरे यांना आपल्याच नावाची शिफारस जिल्हाध्यक्ष असलेल्या वडिलांकडे करावी लागणार आहे. दोघांना उमेदवारी कोणाला द्यायची याचा निर्णय घ्यावा लागणार आहे. या घराणेशाहीवर काँग्रेसमधूनच टीकाटिपणी होण्याची शक्यता आहे.

केतन ठाकरे यांना नुकतीच काँग्रेसने पदोन्नती दिली आहे. ते युवक काँग्रेसमध्ये कार्यरत होते. हर्षवर्धन सपकाळ यांनी त्यांना थेट महासचिव केले आहे. ते आजवर एकही निवडणूक लढले नाही. यावेळी त्यांनी वडिलांच्या पश्चिम नागपूर विधानसभा मतदारसंघातून महापालिकेची निवडणूक लढण्याचे ठरवले आहे. आजवर संघटनेत काम करणारे ठाकरे हे आता वडिलांच्या पावलावर पाऊल ठेवून निवडणुकीत उतरणार आहेत. विकास ठाकरे यांनी पश्चिम नागपूर विधानसभा मतदारसंघाचे निवडणूक प्रभारी म्हणून त्यांचीच निवड केली आहे.

विकास ठाकरे यांच्या आदेशानुसार आगामी महानगर पालिका सार्वत्रिक निवडणीकरिता ६ विधानसभा निहाय प्रभारी व सहप्रभारी ची नियुक्ती करण्यात आली आहे. सर्वांना नियुक्ती पत्रही देण्यात आले आहे.

दक्षिण-पश्चिम नागपूर करिता प्रफुल्ल गुडधे, सहप्रभारी किशोर उमाठे, दक्षिण नागपूर प्रभारी गिरीश पांडव, पूर्व नागपूर आमदार अभिजित वंजारी, सहप्रभारी उमाकांत अग्निहोत्री, मध्य नागपूर अतुल कोटेचा, सहप्रभारी बंटी शेळके, पश्चिम नागपूर करिता प्रभारी केतन ठाकरे, सहप्रभारी राजेश नगरकर, उत्तर नागपूर प्रभारी आमदार नितीन राऊत, सहप्रभारी बंडोपंत टेभुर्णे यांचा समावेश आहे.