विधान परिषद निवडणुकीत शिवसेनेच्या विरोधात भाजपचेही व्यापारी कार्ड

अकोला : विधान परिषदेच्या अकोला-बुलडाणा-वाशीम स्थानिक प्राधिकारी मतदारसंघाच्या निवडणुकीसाठी वातावरण तापलं आहे. यानिवडणुकीत महाविकास आघाडी विरुद्ध भाजप असा सामना रंगणार आहे.

अकोला स्थानिक स्वराज्य संस्थेच्या निवडणुकीमध्ये (Legislative Council elections) भाजपकडून अखेर सराफा व्यावसायिक वसंत खंडेलवाल (vasant khandelwal) यांच्या नावावर शिक्कामोर्तब झाले असल्याची माहिती आहे, याबाबतची अधिकृत घोषणा होणे बाकी आहे.

आता महाविकास आघाडी विरुद्ध भाजप असा सामना रंगणार आहे. भाजपनेही व्यापारी कार्डचा वापर करत शिवसेनेला शह देण्यासाठी प्रयत्न केलाय. दरम्यान अकोल्यातील वसंत खंडेलवाल हे संघ परिवारातील असल्याने त्यांचेच नाव फायनल होईल, अशी शक्यता होती.

शिवसेनेचे विद्यमान आमदार गोपिकिशन बाजोरिया यांची उमेदवारी कायम असली तरी ते महाविकास आघाडीचे उमेदवार असतील, यावर अधिकृत शिक्कामोर्तब झालेले नाही, असले तरी कॉग्रेसचे स्थानिक नेते बाजोरिया हेच महाविकास आघाडीचे उमेदवार असतील, यावर ठाम आहेत. दरम्यान सर्वाधिक मतदार असलेल्या वंचीत बहुजन आघाडीची भूमीका महत्वाची ठरणार आहे.

महाविकास आघाडीच्या उमेदवाराविरुद्ध भाजपचा उमेदवार निश्चित करण्यासाठी मुंबईत तिन्ही जिह्यातील पदाधिकाऱ्यांची बैठक आयोजित करण्यात आली होती. महाविकास आघाडीचे उमेदवार विद्यमान आमदार गोपीकिशन बाजोरिया यांना आव्हान देवू शकणारा त्यांच्या तोडीचा उमेदवार देण्यासाठी चर्चा झाल्यानंतर वसंत खंडेलवाल यांच्या नावावर एकमत झाल्याची माहिती आहे.

खंडेलवाल यांनी २०१५ मध्ये झालेल्या निवडणुकीच्या वेळीही जय्यत तयारी केली होती. त्यामुळे त्यांना या निवडणुकीसंदर्भात चांगलाच अनुभव असल्याने भाजपकडून त्यांना उमेदवारी देण्याबाबत सहमदी झाल्याची माहिती आहे. खंडेलवाल यांचा सोने-चांदी आभूषण विक्रीचा व्यवसाय असून, शिक्षणक्षेत्रातही त्यांनी चांगले काम केले आहे. अकोल्यातील शिक्षण प्रसारक मंडळाचे ते संचालक आहे.