माजी सरन्यायाधीश शरद बोबडे यांना मातृशोक

नागपूर ः भारताचे माजी सरन्यायाधीश शरद बोबडे यांच्या मातोश्री मुक्ताताई बोबडे यांचे मध्यरात्री निधन झाले. त्या ९२ वर्षांच्या होत्या. गेली काही वर्षे वृद्धापकाळाने त्या आजारी होत्या. नागपूर येथील राहत्या घरी त्यांचे निधन झाले.

त्यांचे पती भाऊसाहेब बोबडे हे महाराष्ट्राचे माजी महाअधिवक्ता होते. त्यांच्या समाजोपयोगी भूमिकेमुळे शेतकरी नेते शरद जोशींसह अनेक सामाजिक कार्यकर्त्यांशी मुक्ताताईंचे संबंध आले. त्यांचे थोरले पुत्र विनोद हे सर्वोच्च न्यायालयात वकिली करत असत. त्यांचे काही वर्षांपूर्वी निधन झाले. मुक्ताताईंच्या पश्चात निवृत्त सरन्यायाधीश शरद बोबडे, सून रंजना बोबडे आणि नातवंडे आणि मोठा परिवार आहे.

पालिका प्रशासन म्हणते, खड्ड्यांसाठी पाऊस जबाबदार !

नागपूर ः शहरातील खड्ड्यांसाठी आम्ही नाही तर पाऊस जबाबदार आहे, असा अजब दावा आज महापालिका प्रशासनाने सभागृहात केला. खड्ड्यांसाठी इतरांना दोष देणे योग्य होणार नाही, अशी पुस्ती जोडत प्रशासनाने हात झटकले. खड्ड्य़ांवरून आज झालेल्या मनपा सभेत सदस्यांनी प्रशासनाला चांगलेच धारेवर धरले. आयुक्तांनीही यंदाचा पावसाळा लांबल्याने खड्डे दुरुस्ती लांबल्याचे नमूद केले. सदस्यांचा रोष बघून महापौर दयाशंकर तिवारी रविवारी सुटीच्या दिवशीही खड्डे बुजवा, डिसेंबरपूर्वी शहर खड्डे मुक्त करा, असे निर्देश प्रशासनाला दिले.

शहरातील खड्ड्य़ांसह पायाभूत सुविधा तसेच उत्पन्न, आतापर्यंत केल्या गेलेल्या कामाचा प्रगती अहवालासंदर्भात आज महापालिकेची विशेष सभा ऑनलाइन पद्धतीने पार पडली. खड्ड्य़ांवरून प्रशासनावर सर्वच सदस्यांनी आगपाखड केली. प्रशासनावर वचक नसल्याचा आरोप यावेळी विरोधी पक्षनेते तानाजी वनवे यांनी केला. कॉंग्रेसच्या हर्षला साबळे यांनी खड्ड्य़ांमुळे अपघात होत असल्याकडे लक्ष वेधत अधिकारी केवळ खुर्च्या तोडत असल्याची संतप्त भावना व्यक्त केली. कॉंग्रेसचेच दिनेश यादव यांनी त्यांच्या प्रभागातील खड्डे बुजविले पण डांबरच टाकले नसल्याने रस्ता पुन्हा जैसे थे झाल्याचा आरोप केला. दर्शनी धवड यांनी त्यांच्या प्रभागातील खड्ड्य़ांची स्थिती सांगितली.

सत्ताधारी बाकावरील पिंटू झलके यांनी खड्डेमुक्त शहरासाठी आणखी किती काळ लागेल? असा संतप्त सवाल केला. हॉटमिक्स प्रकल्प कालबाह्य झाला असून नवीन प्रकल्प तयार करण्याची सूचना त्यांनी केली. भाजपचे विकी कुकरेजा, मनीष अतकरे, बाल्या बोरकर, श्रद्धा पाठक, राजेंद्र सोनकुसळे यांनीही प्रशासनावर जोरदार हल्ला चढविला. स्थायी समिती अध्यक्ष प्रकाश भोयर यांनी पावसाळ्यात खड्डे बुजविण्याची प्रक्रिया सुरू राहील, असा प्रकल्प सुरू करता येईल काय? यावर विचार करण्याची सूचना केली. अपक्ष नगरसेविका आभा पांडे यांनी खड्डे बुजविण्यासाठी भरीव तरतूद असताना खड्ड्य़ांमुळे होणाऱ्या अपघातांसाठी जबाबदार कोण? असा प्रश्न उपस्थित करीत पदाधिकाऱ्यांचे नियंत्रण नसल्याचा आरोप केला.

बसपाचे जितेंद्र घोडेस्वार यांनीही खड्ड्य़ांमुळे होणाऱ्या अपघातांसाठी कुणावर गुन्हा दाखल करावा, असा सवाल केला. सदस्यांच्या संतापाची धार बोथट करण्यासाठी प्रशासनाकडून कार्यकारी अभियंत्याने खड्ड्यांसाठी सातत्याने येत असलेल्या पावसाला जबाबदार धरले. आयुक्त राधाकृष्णन बी. यांनीही त्यांच्या निवेदनातून पाऊस लांबल्याने खड्डे बुजविण्यात अडथळा निर्माण झाल्याचे सांगितले.

खड्डे बुजविण्याच्या कामाला वेग देणे गरजेचे आहे. अधिकाऱ्यांनी रविवारची सुटी विसरून त्या दिवशीही खड्डे बुजवावे. झोनस्तरावर विविध विभागासाठी तरतूद असून ती कामे झालीच पाहिजे. मनपा, नासुप्र, राज्य सरकार व केंद्र सरकारच्या रस्त्यांवरील खड्डे किती याबाबत नागरिकांपर्यंत माहिती पोहोचविणे गरजेचे आहे. येत्या आठ दिवसांत शहरातील खड्डे बुजविण्यासाठी नियोजन करावे.

- दयाशंकर तिवारी, महापौर.

पाऊस लांबल्याने खड्डे भरण्यात अडथळे निर्माण झाले. प्रशासन काम करीत नाही, असे नगरसेवकांना वाटते. परंतु, पावसाळ्यानंतर खड्डे बुजविण्याचे नियोजन करण्यात आले आहे. लेबर कॉन्ट्रॅक्टर

तयार असून डांबर खरेदीही करण्यात आली आहे. मागील वर्षी कोरोना होता, शिवाय महापालिकेची आर्थिक स्थितीही बिकट होती. आता खड्ड्यांवर लक्ष केंद्रित करण्यात आले असून डिसेंबरपर्यंत शहर खड्डेमुक्त होईल.

- राधाकृष्णन बी., आयुक्त.