NCP News : भाजपच्या लाटेत शरद पवारांचा शहराध्यक्ष पराभूत; अजितदादांच्या राष्ट्रवादीचीही निराशजनक कामगिरी

Nagpur News : शरद पवार यांच्या राष्ट्रवादी काँग्रेसचे शहराध्यक्ष दुनेश्वर पेठे यांना विधानसभेनंतर महापालिकेच्या निवडणुकीतही पराभवाचा धक्का बसला आहे. मागील महापालिकेच्या निवडणुकीत राष्ट्रवादीचे ते एकमेव निवडून आलेले उमेदवार होते. स्थायी समितीचे माजी अध्यक्ष व परिवहन समितीचे माजी सभापती भाजपच्या बाल्या बोरकर यांनी यावेळी त्यांना पराभवाचा धक्का दिला आहे.

प्रभाग क्रमांक 23 मधून भाजपचे बोरकर यांनी राष्ट्रवादीचे दुनेश्वर पेठे यांच्यात थेट लढत झाली. मागील निवडणुकीत दोघेही वेगवेगळ्या गटातून लढले होते. आपसात लढण्याचे दोघांनी टाळले होते. या प्रभागातील तीन भाजपचे व एक राष्ट्रवादीचा उमेदवार निवडून आला होता.

यावेळी आरक्षणामुळे दोघांवर एकाच गटात लढण्याची वेळ आली होती. यात भाजपच्या बोरकर यांनी बाजी मारली. यापूर्वी बोरकर यांनी काँग्रेसच्या महापौर नरेश गावंडे यांना पराभवाचा धक्का दिला होता. मागील निवडणुकीत राष्ट्रवादीचा एकच नगरसेवक निवडून आला होता. यावेळी अजित पवार यांच्या राष्ट्रवादी काँग्रेसच्या आभा पांडे निवडून आल्या आहोत.

त्यामुळे राष्ट्रवादीचे (NCP) महापालिकेत एकचे संख्याबळ कायम राहणार आहे. पांडे या मागील निवडणुकीत अपक्ष निवडून आल्या होत्या. त्यानंतर त्यांनी अजित पवारांच्या राष्ट्रवादीत प्रवेश केला. विधानसभेच्या निवडणुकीत त्यांनी पूर्व नागपूर विधानसभा मतदारसंघातून बंडखोरी केली होती. विशेष म्हणजे या निवडणुकीत दुनेश्वर पेठे हे महाविकास आघाडीचे अधिकृत उमेदवार होते.

यात दोघांचाही पराभव झाला. भाजपचे (BJP) पालिकेच्या निवडणुकीत वेगवेगळी लढली होती. अजित दादांच्या राष्ट्रवादीने 87 तर शरद पवारांच्या राष्ट्रवादीचे 78 उमेदवार रिंगणात होते. उमेदवारी दाखल केल्यानंतर उद्धव ठाकरे सेना आणि शरद पवारांच्या राष्ट्रवादीने काही ठिकाणी एकमेकांना समर्थन जाहीर केले होते. त्याचाही काही फायदा पेठे यांना झाला नाही.