Winter Session : निवडणुकांचा गोंधळ, हिवाळी अधिवेशन एकाच आठवड्यात गुंडाळणार...

Nagpur News, 03 Dec : नागपूरमध्ये होणाऱ्या हिवाळी अधिवेशनाच्या कालावधीवरून नेहमीच सत्ताधारी आणि विरोधकांमध्ये वाद प्रवाद होत असतात. असे असले तरी अधिवेशनाचा कालावधी फारसा वाढल्याचे दिसत नाही.

नागपूर करारानुसार अधिवेशन एक महिन्याचे घ्यावे, अशी मागणी सातत्याने होत असली तरी यावेळी नगरपालिका, महापालिका आणि जिल्हा परिषदेच्या गोंधळामुळे हिवाळी अधिवेशन एकाच आठवड्यात गुंडाळण्यात येणार आहे.

अधिवेशन कार्यक्रम आखण्यासाठी आज कामकाज सल्लागार समितीची बैठक झाली आहे. यात अधिवेशनाचा कालावधी ८ डिसेंबर ते १४ डिसेंबर असा ठरवण्यात आला आहे. निवडणूक आयोगाने काही नगरपालिका आणि नगर परिषदा पुढे ढकलल्या आहेत.

त्या आता २० डिसेंबरला होणार आहे. २१ डिसेंबरला एकत्र मतमोजणी करण्यात येणार आहे. आचार संहितेच्या दरम्यान अधिवेशन घेण्यात येणार आहे. त्यामुळे सरकारला मोठ्या घोषणा करता येणार नाही. विरोधकांवरही आत्ताच्या आता मागण्या पूर्ण करा या मागणीवर मर्यादा येणार आहे. एरवी अधिवेशनाचे कामकाज सोमवार ते शुक्रवार चालते.

शनिवारी आणि रविवारी सुटी दिली जाते. यावेळी मात्र शनिवारी आणि रविवारी सुटीच्या दिवशीसुद्धा अधिवेशनाचे कामकाज घेण्यात येणार आहे. एकूण सात दिवसांचे हे अधिवेशन होणार आहे. महायुती पुन्हा निवडून आल्यानंतर पहिले अधिवेशन नागपूरला घेण्यात आले होते. नागपूरमध्येच मंत्रिमंडळाचा विस्तार आणि शपथविधी घेण्यात आला होता.

हे अधिवेशन नेत्यांच्या नाराजीमुळे चांगलेच गाजले होते. छगन भुजबळ आणि सुधीर मुनगंटीवार यांना मंत्रिमंडळातून डच्चू देण्यात आला होता. त्यामुळे नाराज झालेले भुजबळ निघून गेले होते तर मुनगंटीवार नागपूरमध्ये असूनही अधिवेशनाच्या कामकाजात सहभागी झाले नव्हते. मंत्री धनंजय मुंडे वादात अडकले होते. ते शेवटचे दोनच दिवस सभागृहात बसले होते. आता भुजबळ मंत्रिमंडळात परतले आहेत तर मुंडे आऊट झाले आहेत.