Nagpur ZP Election : 'झेडपी'तील महिला आरक्षणावरून पुरुष उमेदवारांमध्ये असंतोष; थेट कोर्टात जाण्याची केली तयारी

Nagpur News, 14 Oct : नागपूर जिल्हा परिषदेच्या आरक्षणावरून मोठा असंतोष उफाळून आला आहे. महिलांसाठी 50 टक्के जागा राखीव ठेवताना काही तालुक्यांवर अन्याय झाला आहे. या तालुक्यांमधील इच्छुक पुरुष उमेदवारांकडून आम्ही कुठून लढावे? अशी विचारणा केली जात आहे.

या विरोधात आता थेट कोर्टात दाद मागण्याची तयारी देखील या पुरुष उमेदवारांकडून केली जात आहे. काही तालुक्यांमध्ये एका सर्कलचा अपवाद वगळता उर्वरित सर्वच्या सर्व मतदारसंघ महिलांसाठी राखीव झाल्याने आरक्षणाच्या सोडतीवर शंका घेतली जात आहे.

नरखेड तालुका आणि कामठी तालुक्यातील 4 पैकी 3 सर्कल महिलांसाठी राखीव करण्यात आले आहे. हिंगणा तालुक्यात 5 सर्कल आहेत. यापैकी एकमेव सर्कलमधून पुरुषांना लढता येणार आहे. ते सर्कलसुद्धा अनुसूचित जातीसाठी राखीव झाले आहे.

काटोल विधानसभा मतदारसंघातील नरखेड तालुक्यात जिल्हा परिषदेचे एकूण 4 सर्कल आहेत. त्यापैकी बेलानो, सावरगाव आणि जलालखेडा हे महिलांच्या वाट्याला गेले आहे. भिष्णूर या एकमेव सर्कलमधून पुरुष उमेदवाराला लढता येणार आहे. हिंगणा तालुक्यात पाच सर्कल आहेत. यापैकी चार महिलांसाठी राखीव झाले आहेत.

यात रायपूर, इसासनी, टाकळघाटचा समावेश आहे. उरलेले सावंगी देवळी हे एकमेव सर्कल अनुसूचित जमातीसाठी राखीव झाले आहे. त्यामुळे सर्वाधिक असंतोष हिंगणा तालुक्यात निर्माण झाला आहे. भिवापूर तालुक्यातील दोन महिला आणि एक सर्कल अनुसूचित जमातीसाठी राखीव झाले आहे.

दुसरीकडे शेजारीच असलेल्या उमरेड तालुक्यातील चार पैकी एकच सर्कल महिलेसाठी राखीव आहे. कळमेश्वर तालुक्यातील तीनपैकी 2 महिलेसाठी, पारशिवणी तालुक्यातील चार पैकी दोन महिलेसाठी, रामटेक तालुक्यातील पाचपैकी तीन महिलेसाठी राखीव आहेत.

यापैकी वडांबा, बोथिया, सोनघाट, मनसर हे चार सर्कल अनुसूचित जमाती तर उरलेले नगरधन सर्कल ओबीसी महिलेसाठी राखीव आहे. मौदा तालुक्यातील 5 पैकी दोन महिलांसाठी राखीव ठेवण्यात आले आहे. सावनेर तालुक्यात सर्वाधिक सात सर्कल आहेत. त्या पैकी फक्त दोन सर्कल महिलांसाठी राखीव झाले आहे.