नाना पटोले म्हणाले, हा जागतिक पातळीवर भारताला टार्गेट करण्याचा प्रयत्न !

नागपूर : भाजप हा संविधानाला न मानणारा पक्ष आहे. भाजपच्या दोन प्रवक्त्यांनी मोहम्मद पैगंबरांबद्दल अपशब्द वापरून जागतिक पातळीवरून भारताला टारगेट करण्याचा प्रयत्न केला. जागतिक पातळीवरून दबाव आल्यानंतर कुठे भाजपने दोन प्रवक्त्यांना निलंबित केले, असे कॉंग्रेसचे प्रदेशाध्यक्ष नाना पटोले आज येथे म्हणाले.

संविधानाने प्रत्येकाला आपआपल्या धर्मावर प्रेम करण्याचा अधिकार दिलेला आहे. पण दुसऱ्याच्या धर्मावर टिका करण्याचा अधिकार कुणालाही नाही. भारताचा (India) अपमान करण्याचा अधिकार भाजपला (BJP) कुणी दिला, असा प्रश्‍न आता विचारला जात आहे. भाजप प्रवक्त्यांच्या त्या वक्तव्यानंतर भारतातील कुठलीही वस्तू आम्ही आता घेणार नाही, असा दबाव जेव्हा जागतिक पातळीवरून आला आणि भारताशी संबंध तोडण्याची भूमिका जगभरात घेण्यात आली त्यानंतर भाजपने त्यांच्या नूपुर शर्मा (Nupur Sharma) आणि नवीन जिंदल या दोन प्रवक्त्यांना निलंबित केले. नाहीतर आताही त्यांचे लांगूलचालन सुरू राहिले असते, असे नाना पटोले (Nana Patole) यांनी सांगितले.

भाजपने सतत संविधानविरोधी भूमिका घेतली आहे, हे गत ८ वर्षांत देशवासीयांनी बघितले आहेच आणि आता मोहम्मद पैगंबरांबद्दल अपशब्द वाढवून भाजपने भारतासह जगभरातील लोकांचा रोष ओढवून घेतला आहे. भारतात तर आता लोक भाजपला वाडीत टाकतील, अशी परिस्थिती निर्माण झाली आहे. जेव्हा भाजप सत्तेत नव्हती, तेव्हा ते सतत सांगत हो, की आम्ही सत्तेत आलो की, कलम ३७० हटवू. ३७० हे काय प्रकरण हे शेवटपर्यंत लोकांना कळलेच नाही आणि ३७० कलम हटवल्यानंतर काय परिस्थिती झाली, हे देश पाहतो आहे.

कलम ३७० हटवल्यानंतर जम्मू काश्‍मीरमध्ये भाजप निवडणुका घेऊ शकत नाहीये. अजूनही तेथे राष्ट्रपती राजवट सुरू आहे. काश्मिरी पंडितांच्या विषयावर राजकारण करून भाजपच्या लोकांना आपल्या पोळ्या शेकल्या आणि आज काश्मिरी पंडितांवर तेथे अत्याचार केले जात असताना ते त्यांचे संरक्षण करू शकत नाहीये. काश्मिरी पंडितांना टारगेट करून त्यांचे खून केले जात आहेत आणि अशा परिस्थितीतही ते केवळ ‘काश्‍मीर फाईल्स’ सिनेमाचे प्रमोशन करण्यात गुंतलेले आहेत, असा घणाघात नाना पटोले यांनी केला.