Standing Committee : महापालिकेच्या तिजोरीच्या चाव्या राष्ट्रवादीकडे, स्थायी समिती सभापतीपदी मार्डीकर

NCP News : अमरावती महापालिकेच्या तिजोरीच्या चाव्या राष्ट्रवादी काँग्रेसच्या हाती आल्या आहेत. गटनेते अविनाश मार्डीकर हे स्थायी समितीचे सभापतीपदी निवडून आले आहेत. त्यांनी काँग्रेसचे प्रशांत महल्ले यांचा पराभव केला. विरोधी पक्षापैकी एमआयएमने यावेळीही तटस्थेतेची भूमिका घेतली.

चार वर्षानंतर झालेल्या महापालिकेच्या सार्वत्रिक निवडणुकीनंतर अस्तित्वात आलेल्या पहिल्या स्थायी समितीच्या सभापतीपदाची निवडणूक आज पार पडली. या निवडणुकीत महायुतीकडून राष्ट्रवादीला या पदासाठी संधी देण्यात आली.

राष्ट्रवादीचे अविनाश मार्डीकर व काँग्रेसकडून प्रशांत महल्ले यांनी नामांकन दाखल केले होते. पाठासीन अधिकारी जिल्हाधिकारी आशिष येरेकर यांच्या उपस्थितीत निवडणूक पार पडली. सोळा सदस्यांपैकी अकरा सदस्यांनी मार्डीकर यांच्या बाजूने तर तीन सदस्यांनी प्रशांत महल्ले यांना मतदान केले. आठ मतांनी अविनाश मार्डिकर यांचा विजय झाल्याचे पिठासीन अधिकाऱ्यांनी घोषित केले.

मार्डिकर स्थायी समितीचे एकतीसावे सभापती बनले आहेत. मावळत्या पंचवार्षिकमध्येही ते या पदावर होते. विद्यमान स्थायी समितीत सोळा सदस्य असून अकरा सदस्य महायुतीचे आहेत. त्यामुळे ही निवडणूक एकतर्फी होणार हे आधीच स्पष्ट होते. मात्र बिनविरोध निवड होऊ नये यासाठी काँग्रेसने तीन सदस्यांच्या जोरावर उमेदवार रिंगणात आणला. एमआयएमने मात्र नेहमीप्रमाणे तटस्थ भूमिका घेतली. या पक्षाचे दोन सदस्य स्थायी समितीत आहेत.

पिठासिन अधिकारी आशिष येरेकर व महापालिका आयुक्‍त सौम्‍या शर्मा चांडक यांनी महापौर श्रीचंद तेजवाणी, उपमहापौर सचिन भेंडे, सभागृह नेता चेतन गावंडे, गटनेता नाना आमले, डॉ. राजेंद्र तायडे, शेख हमिद शेख वाहेद, पदाधिकारी, नगरसेवक व नगरसेविका यांनी स्‍थायी समिती सभापती अविनाश मार्डिकर यांचे पुष्‍पगुच्‍छ देवुन स्वागत केले.