Omprakash Yadav : नागपूर पदवीधरच्या पराभवाला 'ते' नेतेच जबाबदार, CM फडणवीसांच्या मतदारसंघात कमी नोंदणी, ओमप्रकाश यादवांचा खळबजनक दावा

Nagpur News : नागपूर विभाग पदवीधर मतदारसंघातील पराभव भाजपच्या चांगलाच जिव्हारी लागला आहे. या पराभवानंतर पक्षातील पदाधिकारी आणि नेत्यांमधील नाराजी उघडपणे समोर येऊ लागली आहे. मुख्यमंत्री देवेंद्र फडणवीस यांच्या नागपूर दक्षिण-पश्चिम विधानसभा मतदारसंघात पदवीधर मतदारांची नोंदणी करण्याची मोठी संधी असतानाही अत्यंत कमी नोंदणी झाल्याचा आरोप भाजप नेते ओमप्रकाश यादव यांनी केला आहे.

मतदार नोंदणी कमी होण्यामागे पक्षातीलच काही नेते जबाबदार असल्याचा दावाही त्यांनी केला. तसेच, भाजपचे उमेदवार सुधाकर कोहळे यांच्या नावासमोर केवळ '२' हा आकडा लिहिल्यामुळे मोठ्या संख्येने मते जाणीवपूर्वक अवैध ठरवण्यात आल्याचा आरोप यादव यांनी केला आहे.

निवडणुकीसाठी मतदार नोंदणी आणि इतर जबाबदाऱ्या सोपवलेल्या नेत्यांनी आपले काम योग्यरीत्या केले का, याची पक्षाने चौकशी करावी, अशी मागणीही त्यांनी केली आहे.

ते म्हणाले, पक्षाने आत्मपरीक्षण करावे. साऱ्या निवडणुकीत असमाधानी असतात ते नेते पक्ष नोंदणीवेळी कुठे गेले होते हे त्यांना विचारायला हवे.नोंदणी न होण्याचे कारण काय आहे, याचे विचारणा झाली पाहिजे.

अभिजीत वंजारी विजयी

नागपूर विभाग विधान परिषद पदवीधर मतदारसंघाच्या निवडणुकीत काँग्रेसचे उमेदवार अभिजीत वंजारी यांनी भाजपच्या सुधाकर कोहळेंचा पराभव केला. वंजारी यांना प्रथम व द्वितीय पसंतीक्रमाची एकूण ६७ हजार २३१ मते मिळाली. तर कोहळे यांना ६३ हजार ९६० मते मिळाली.