Amravati Graduate Election: भाजपच्या मतदारांनीच केला रणजीत पाटलांचा पराभव; अजित दादांचा दावा किती खरा?

Amravati Graduate Election: अमरावती पदवीधर मतदारसंघात महाविकास आघाडी (MVA) पुरस्कृत धीरज लिंगाडे यांचा दणदणीत विजय झाला. तर भाजपचे उमेदवार डॉ. रणजीत पाटील यांचा पराभव झाला.

भाजपचे रणजित पाटील यांना 41हजार 005 मते मिळाली तर काँग्रेसचे धिरज लिंगाडे यांना 43 हजार 383 मते मिळाली आहेत. पण यामध्ये आठ हजार 551 मते अवैध ठरली. या अवैध मतांची पुन्हा एकदा तपासणी करण्याची मागणी रणजित पाटील यांच्या प्रतिनिधींना केली आहे.

या बाद मतांबाबत विरोधीपक्षनेते अजित पवार यांनी भाष्य केलं आहे. एका वृत्त वाहिनीला दिलेल्या मुलाखतीत त्यांनी अमरावती पदवीधर मतदार संघाच्या निकालावर भाष्य केलं आहे. ''मी अमरावती पदवीधर मतदार संघाच्या निकालाची माहिती घेत होतो. यात कोणालाच एक नंबरची मतं मिळाली नाहीत. यात एक दोन तीन चार अशी मतं द्यायची असतात. दुसऱ्या नंबरला डॉ. रणजीत पाटील यांना मतं देण्यात आली. तशी चार हजार मतं निघाली. ती चार हजार मतं बीजेपी मांइंडेड असताना त्यांनी एक नंबरचं न देता दोन नंबरला मतं दिली. आता ही दुसऱ्या पसंतीची मतं का दिली गेली.

डॉ. रणजीत पाटील तसे सज्जन पुरुष. पण विभागातील सर्वात मोठा जिल्हा म्हणजे अमरावती आणि या जिल्ह्याकडे त्यांनी सातत्याने दुर्लक्ष केले. त्यांच्या पराभवामागील हे एक मोठे कारण आहे. वरून दिसत नसली तरी भाजपमध्ये गटबाजी आहे. रणजीत पाटलांचे भाजपमधील एका मोठ्या गटासोबत (अकोला) पटत नाही. या गटाचे नेते भाजपमधील मोठे प्रस्थ आहे. त्या गटासोबत जुळवून न घेणे, याचा फटका त्यांना बसला. पाटलांचा विरोधी गट केवळ तटस्थ राहिला असे नाही, तर त्या गटाने पाटलांच्या विरोधात काम केले. 

आपल्या वरिष्ठांना त्यांना काहीतरी सुचवायचं असेल, ते सर्व पदवीधर होते. त्यांनी पहिल्या पसंतीची मतं रणजीत पाटलांना का दिली नाही, दोन नंबरची मतं दिली. त्यामुळेचं ती मतं बाद झाली. सकाळी तिथली आठ हजार मतं बाद होती. मी म्हटलं एवढी कशी, ते म्हणाले, दोन नंबरची चार हजार मतं होती. एक नंबरचं मत नसल्यावर ते मत बाद होतं. म्हणजेच, भाजपच्या लोकांनाचं रणजीत पाटलांचे नेतृत्व नको होते.'' असे स्पष्टीकरण अजित पवार यांनी दिले आहे.