Ravi Rana : किशोरी पेडणेकर यांनी किती खोके 'मातोश्री'ला पोहचविले? राणांचा गंभीर आरोप!

अमरावती : आमदार रवी राणा आणि आमदार बच्चू कडू यांच्यात काही दिवसांपासून आरोप - प्रत्यारोप होत आहे. यामध्ये आता थेट मुख्यमंत्री - उपमुख्यमंत्र्यांनी हस्तक्षेप केल्याने त्यांच्यातील वाद काही प्रमाणात निवळल्याचे दिसतआहे. मात्र याच मुद्द्यावरून आता शिवसेना ठाकरे गटाचे नेते व आमदार आदित्य ठाकरे यांनी शिंदे -फडणवीस सरकारवर टीकी केली होती. खोक्यांवरून खोके सरकारमधील दोन आमदार भांडतायेत, असे ठाकरे यांनी म्हंटले होते. यावर आता रवी राणांनी ठाकरेंना प्रत्युत्तर देताना गंभीर आरोप केला आहे.

रवी राणा म्हणाले, मी माझ्या सिद्धांताची लढाई लढतो. जनतेत काम करतो. माझा कोणाशीही कसला वाद नाहीये. उद्धव ठाकरे आणि आदित्य ठाकरे यांनीच मातोश्रीवर बसून मुंबई महानगरपालिकेतल्या “खोक्याचं”राजकारण सुरू केलं. शिवसेनेच्या नेत्या किशोरी पेडणेकर या महापौर होत्या. तेव्हा त्यांनी किती खोके मातोश्रीवर पोहोचवल्या. हे सगळ्यांना माहिती आहे.

मुंबईत खोके घेतल्याशिवाय उद्धव ठाकरे यांचा पत्ताही हलत नव्हता. खोक्याची ही प्रथा उद्धव ठाकरे आणि आदित्य ठाकरे यांनीच सुरू केलेला आहे, असा गंभीर आरोप त्यांनी केला. एका खाजगी वृत्तवाहिनीशी बोलताना त्यांनी हा आरोप केला आहे.

यावेळी राणा म्हणाले की, माझे नेते हे उपमुख्यमंत्री देवेंद्र फडणवीस आहेत. फडणवीस यांनी राज्यातील शेतकऱ्यांना न्याय दिला. दिवाळीपूर्वीच शेतकऱ्यांच्या खात्यात पैसे आले आहेत. एकट्या अमरावती जिल्ह्यातच ५५४ कोटी रुपये दिले गेले. यामुळे शेतकऱ्यांची दिवाळी चांगली गेला आहे. आम्हाला विशेष अभिमान वाटतो की, विदर्भाचा एक चांगला नेता, राज्याच्या राजकारणात आहे.