Chandrashekhar Bawankule : नागपुरात मोठा राजकीय भूकंप! बहुजन रिपब्लकनला बावनकुळेंसोबत भांडण महागात पडलं, उरले-सुरले नगरसेवकही भाजपकडे गेले

Nagpur News : नगरपालिकेच्या निवडणुकीत जागा वाटपावरून नागपूर जिल्ह्याचे पालकमंत्री चंद्रशेखर बावनकुळे आणि बहुजन रिपब्लकन एकता मंचच्या नेत्या माजी मंत्री ॲड. सुलेखा कुंभारे यांच्यात टोकाची भांडणे झाली होती. याचा मोठा धक्का कुंभारे यांना बसला आहे. नागपूर महापालिकेच्या निवडणुकीत त्यांच्या पक्षाच्या दोन्ही माजी नगरसेवकांनी भाजपकडून लढण्याचा निर्णय घेतला आहे.

मागील महापालिकेच्या निवडणुकीत कुंभारे यांचा बहुजन रिपब्लिकन एकता मंचने भाजपसोबत युती केली होती. त्यांना दोन जागा भाजपने दिल्या होत्या. मात्र उमेदवारांच्या हाती कमळ देण्यात आले होते. नागेश सहारे आणि वंदना भगत हे दोन्ही उमेदवार निवडून आले होते. कामठी नगरपालिकेच्या निवडणुकीत कुंभारे आणि बावनकुळे यांच्यात कडाक्याचे भांडण झाले. कुंभारे यांनी मतचोरी करून बावनकुळे निवडून आल्याचा आरोप केला.

तसेच नगरपालिकेच्या निवडणुकीत भाजपने पैसे वाटले, नगराध्यक्षपदाचे उमेदवार यांच्या नातेवाइकाच्या फार्महाऊवरून पैसे वाटप केल्याचा दावाही कुंभारे यांनी पत्रकार परिषद घेऊन केला होता. त्यावरून दोन्ही नेत्यांमधील संबंध चांगलेच ताणल्या गेले. बावनकुळे यांचे कामठी विधानसभा मतदारसंघाचे दार आपण बंद करण्याचा इशाराहीसुद्धा त्यांनी दिला होता.

दरम्यान सातत्याने होणाऱ्या माध्यमांमधील बदनामीवरून बावनकुळे यांनी कुंभारे यांना कायदेशीर नोटीस बजावली. याशिवाय पाच कोटी रुपयांचा मानहानीचा दावा त्यांच्यावर ठोकला. यादरम्यान आता नागपूर महापालिकेच्या निवडणुकींचा बिगूल वाजला असून आता कुंभारे यांच्या पक्षासाठी जागा सोडण्यात भाजप तयार नसल्याचे समजते.

बहुजन रिपब्लिकन एकत मंचच्या माजी नगरसेविका वंदना भगत यांनी आपण भाजपकडून लढणार असल्याचे स्पष्ट केले आहे. तर नागेश सहारे म्हणाले, मी कुंभारे यांच्यासोबत होतो. मात्र महापालिकेच्या निवडणुकीपूर्वीच भाजपात प्रवेश केला होता. फक्त माझी जागा त्यांच्या कोट्यात दाखवण्यात आली होती. बहुजन रिपब्लिकन एकता मंचसोबत आपला काही आता संबंध नसल्याचे सहारे यांनी स्पष्ट केले.

बावनकुळे आणि कुंभारे यांच्यात झालेल्या भांडणावर अद्यापही कोणाचा विश्वास बसत नाही. कामठी नगरपालिकेच्या निवडणुकीची ती रणनीती होती असा दावा केला जात आहे. लोकसभेच्या निवडणुकीत कामठीमध्ये मोठा फटका भाजपला बसला होता. तो टाळण्यासाठी सुलेखा कुंभारे यांना स्वतंत्रपणे लढवण्यात आल्याचे सांगण्यात येते. कामठी नगरपालिका निवडणुकीचा निकाल जाहीर झाल्यावर दोन्ही नेते सर्व काही विसरून जातील आणि पुन्हा एकत्र दिसतील असाही विश्वास कुंभारे यांच्या समर्थकांचा आहे.

FAQs :

1. बावनकुळे आणि कुंभारे यांच्यात वाद कशावरून झाला?
➡️ नागपूर महापालिका निवडणुकीतील जागावाटपावरून.

2. या वादाचा कुंभारे यांच्यावर काय परिणाम झाला?
➡️ त्यांच्या पक्षातील माजी नगरसेवकांनी भाजपकडे जाण्याचा निर्णय घेतला.

3. किती नगरसेवकांनी भाजपकडून लढण्याचा निर्णय घेतला आहे?
➡️ दोन्ही माजी नगरसेवक.

4. हा निर्णय कोणत्या निवडणुकीसाठी आहे?
➡️ नागपूर महापालिका निवडणूक.

5. यामुळे नागपूरच्या राजकारणात काय बदल होऊ शकतो?
➡️ भाजपची ताकद वाढण्याची शक्यता आहे.