Sharad Pawar NCP: महापालिकेच्या निवडणुकीत पक्षाला भोपळा,शरद पवारांच्या राष्ट्रवादी काँग्रेस शहराध्यक्षाचा तडकाफडकी राजीनामा

Nagpur News: नागपूर महापालिकेच्या निवडणुकीत शरद पवार यांच्या राष्ट्रवादी काँग्रेसला भोपळा फोडता आला नाही. त्यांचा एकही उमेदवार निवडून आला नाही. शहराध्यक्ष दुनेश्वर पेठे यांनीसुद्धा निवडणूक लढली होती. त्यांनाही आपला प्रभाग राखता आला नाही. या पराभवाची जबाबदारी स्वीकारून त्यांनी अध्यक्षपदाचा राजीनामा दिला आहे.

राष्ट्रवादी काँग्रेसचे राष्ट्रीय अध्यक्ष शरद पवार (Sharad Pawar), प्रदेशाध्यक्ष आणि विदर्भाचे नेते अनिल देशमुख यांच्याकडे त्यांनी आपले राजीनामापत्र पाठविले आहे. यामुळे त्यांच्यासोबत लढलेल्या उमेदवारांमध्ये मोठी अस्वस्थता निर्माण झाली आहे. राष्ट्रवादी काँग्रेसचे एकूण 78 उमेदवारांनी महापालिकेची निवडणूक लढली. यात पेठे यांच्यासह माजी आमदार प्रकाश गजभिये यांचासुद्धा समावेश होता. पक्षाचे पाच ते सात उमेदवार निवडून येतील अशी आशा राष्ट्रवादील होता.

निवडणुकीच्या मध्यात उद्धव बाळासाहेब ठाकरे सेना आणि राष्ट्रवादीने जिथे जिथे उमेदवार नाही त्या त्या जागेवर एकमेकांच्या उमेदवारांना समर्थन जाहीर केले होते. मात्र त्याचाही फायदा राष्ट्रवादीला झाला नाही. मागील निवडणुकीत पेठे हे एकमेव निवडून येणारे नगरसेवक होते.

विधानसभेच्या निवडणुकीत पूर्व नागपूर विधानसभा मतदारसंघातून पेठे हे महाविकास आघाडीचे उमेदवार होते. या जागेवर काँग्रेसचा दावा होता. तो हिरवून घेतल्याने त्यावेळी काँग्रेसमध्ये मोठी नाराजी होती. याचाही फटाक पेठे यांना बसला होता. भाजपचे कृष्णा खोपडे या मतदारसंघातून विक्रमी मतांनी निवडून आले.

विधानसभा लढल्यानंतर पेठे हे महापालिकेची निवडणूक लढणार नाही असे वाटत होते. मात्र कार्यकर्त्यांमध्ये आलेली मरगळ झटकण्यासाठी त्यांनी ही निवडणूक लढण्याचे ठरवले होते.

काँग्रेससोबत आघाडीचेही प्रयत्न झाले. काँग्रेसने 11 जागा राष्ट्रवादी काँग्रेसला देऊ केल्या होत्या. मात्र शेवटच्या टप्प्यात महाविकास आघाडी तुटली. त्यानंतर राष्ट्रवादी काँग्रेसने स्वबळावर निवडणूक लढण्याचा निर्णय घेतला.