Aditi Tatkare : E-KYC त्रासदायक? OTP न आल्याने महिला हैराण, आदिती तटकरे नेमकं काय म्हणाल्या...

‘मुख्यमंत्री माझी लाडकी बहीण’ या महत्वाकांक्षी योजनेचा लाभ घेण्यासाठी सर्व महिलांना ई-केवायसी करणे अनिवार्य करण्यात आले आहे. या प्रक्रियेसाठी शासनाने दोन महिन्यांचा कालावधी दिला असला तरी अनेक महिलांना केवायसी करताना मोठ्या अडचणींना सामोरे जावे लागत आहे. विशेषतः ओटीपी न येणे, तांत्रिक त्रुटी, नेटवर्क समस्या यामुळे हजारो महिला हैराण झाल्या आहेत.

याच पार्श्वभूमीवर महिला व बालविकास विभागाच्या मंत्री आदिती तटकरे यांनी महत्त्वाचा निर्णय जाहीर केला आहे. त्यांनी सोशल मीडियावर पोस्ट करत महिलांना दिलासा दिला. तटकरे म्हणाल्या की, “मुख्यमंत्री माझी लाडकी बहीण योजनेचे E-KYC करताना OTP बाबत काही तांत्रिक अडचणी येत असल्याची बाब निदर्शनास आली आहे. महिला व बालविकास विभागाच्या वतीने याची गांभीर्याने दखल घेण्यात आली असून, तज्ञांच्या माध्यमातून याबाबत उपायोजना करण्याचे काम प्रगतीपथावर आहे. लवकरच ही तांत्रिक अडचण दूर होऊन E-KYC प्रक्रिया अधिक सुलभ व सुकर होणार याबाबत मी सर्व लाडक्या बहिणींना आश्वस्त करते..”

म्हणजेच, येत्या काही दिवसांत महिलांना केवायसी करताना कोणताही त्रास होणार नाही, असा विश्वास त्यांनी व्यक्त केला. या निर्णयामुळे लाभार्थींना मोठा दिलासा मिळणार आहे.

दरम्यान, केवायसी प्रक्रियेत आणखी एक महत्त्वाचा निर्णय घेण्यात आला आहे. महिलांसोबतच त्यांचे पती किंवा वडिलांचीही केवायसी केली जाणार आहे. यामधून लाभार्थी कुटुंबाचे उत्पन्न तपासले जाणार असून २.५ लाख रुपयांपेक्षा जास्त उत्पन्न असलेल्या कुटुंबांना योजनेचा लाभ मिळणार नाही. शासनाच्या या भूमिकेमुळे योजनेचा लाभ खऱ्या अर्थाने पात्र आणि गरजू महिलांपर्यंत पोहोचेल, असा हेतू आहे.

‘लाडकी बहीण’ योजनेमुळे राज्यातील लाखो महिलांना आर्थिक बळ मिळणार आहे. मात्र, सुरुवातीच्या टप्प्यात तांत्रिक अडचणींमुळे महिलांना त्रास सहन करावा लागला. आता तटकरे यांनी दिलेल्या आश्वासनामुळे महिलांना दिलासा मिळत असून, लवकरच सर्व लाभार्थींना कोणत्याही अडचणीशिवाय केवायसी करता येणार आहे.