kannada संघटनांना जशास तसे उत्तर देणार; मध्यवर्ती महाराष्ट्र एकीकरण समितीचा इशारा

kannada Vs Marathi : चित्रदुर्ग येथे महाराष्ट्र राज्य मार्ग परिवहन मंडळाच्या बस चालकाला कन्नड संघटनांनी काळे फासल्याची घटना अतिशय निंदनीय आहे. कन्नड संघटनांना येणाऱ्या काळात जशास तसे उत्तर दिले जाईल, असा इशारा मध्यवर्ती महाराष्ट्र एकीकरण समितीचे कार्याध्यक्ष आणि माजी आमदार मनोहर किणेकर यांनी दिला आहे. ते सरकारनामा आणि सकाळशी बोलत होते.

एका बाजूला महाराष्ट्र-कर्नाटक सीमावादावरून नियमित आंदोलनं सुरु असतात. अशात दुसऱ्या बाजूला कर्नाटकमधील चित्रदुर्गजवळ महाराष्ट्र राज्य मार्ग परिवहन महामंडळाची बस कन्नड समर्थक संघटनांनी फोडली. तसेच चालकाला कर्नाटकात येताय तर कन्नडच बोलायचं असं म्हणत त्याच्या तोंडाला काळे फासले. या घटनेवर महाराष्ट्रात (Maharashtra) संतापाची लाट उसळली आहे. खबरदारीचा उपाय म्हणून महाराष्ट्र-कर्नाटक बस वाहतूक तुर्तास थांबवण्यात आली आहे.

याबाबत बोलताना मनोहर किणेकर म्हणाले, शुल्लक कारणावरून कन्नड संघटना नेहमीच गोंधळ निर्माण करण्याचा प्रयत्न करतात. चित्रदुर्ग येथे महाराष्ट्र परिवहन मंडळाच्या बस चालकाला कन्नड संघटनांनी काळे फासल्याची घटना अतिशय निंदनीय आहे. कन्नड संघटनांना येणाऱ्या काळात जशास तसे उत्तर दिले जाईल.

बेळगाव आणि सीमा भागातील मराठी भाषिकांवर दादागिरी करून कर्नाटक सरकार आणि कन्नड संघटना अन्याय करीत आहेत. याची महाराष्ट्र सरकारने लवकर दखल घेतली पाहिजे. गेली अनेक वर्षे लोकशाहीच्या मार्गातून महाराष्ट्रात जाण्यासाठी मराठी भाषिक (Marathi) लढा देत आहेत त्याला महाराष्ट्र सरकार आणि महाराष्ट्रातील जनतेने साथ दिली पाहिजे, अशीही मागणी किणेकर यांनी केली.

कन्नड संघटनाना प्रशासनाने आवर घालावा अशी मागणी अनेकदा करण्यात आली आहे. त्याकडे दुर्लक्ष केले जात असल्यामुळे महाराष्ट्र एकीकरण समितीलाही आक्रमक भूमिका घ्यावी लागणार आहे, असेही किणेकर म्हणाले.