काँग्रेसमध्ये स्टारपॉवर; भाई जगतापांच्या उपस्थितीत अभिनेत्रीचा पक्षप्रवेश

नवी दिल्ली : आगामी महापालिका निवडणुका स्वबळावर लढण्याची घोषणा काँग्रेसने (Congress) केली आहे. मुंबई काँग्रेसचे अध्यक्ष भाई जगताप (Bhai Jagtap) यांनी यासाठी जोरदार तयारी सुरू केली आहे. आता काँग्रेसमधील स्टारपॉवर वाढवणारे पाऊल जगताप यांनी उचलले आहे. अभिनेत्री काम्या पंजाबी (Kamya Punjabi) यांनी आज काँग्रेसमध्ये प्रवेश केला.

काम्या पंजाबी या बिग बॉस सीझन 7 मधील स्पर्धक होत्या. त्या मालिकांमधील लोकप्रिय अभिनेत्री आहेत. शक्ती-अस्तित्व के एहसास की या शोचे चित्रीकरण त्यांनी नुकतेच संपवले आहे. त्या दोन दशकांहून अधिक काळ अभिनय क्षेत्रात आहेत. बनू मै तेरी दुल्हन, मर्यादा : लेकीन कब तक?, बेइंतहा आदी लोकप्रिय मालिकांमध्ये त्यांनी अभिनय केला आहे. अनेक मुद्द्यांवर त्या सातत्याने ट्विटरच्या माध्यमातून आवाज उठवत असतात.

काम्या पंजाबी यांच्या पक्ष प्रवेशाचा कार्यक्रम आज मुंबईत झाला. या वेळी पक्षाचे नेते तहसीन पूनावाला हेसुद्धा उपस्थित होते. तहसीन पूनावाला यांनी काम्या यांचे पक्षात स्वागत असल्याचे ट्विट केले आहे. त्यांनी म्हटले आहे की, काम्या पंजाबी यांनी काँग्रेस परिवारात प्रवेश केला असून, त्यांच्या पुढील वाटचालीसाठी शुभेच्छा. प्रियांका गांधी यांच्यापासून प्रेरणा घेऊन सोनिया गांधी आणि राहुल गांधी यांच्या मार्गदर्शनाखाली काम्या या जनतेची सेवा करतील. भाई जगताप यांच्यासारखे अध्यक्ष लाभणे हे त्यांच्यासाठी सुदैवाचे आहे.

दरम्यान, नवी दिल्लीतील काँग्रेस मुख्यालयात काँग्रेसचे सरचिटणीस, प्रभारी आणि प्रदेशाध्यक्ष यांची बैठक सोनिया गांधी यांनी नुकतीच घेतली. त्यासाठी भाई जगताप दिल्लीमध्ये गेले होते. या बैठकीतनंतर त्यांनी माध्यमांशी संवाद साधला होता. सोनिया गांधी यांच्या बैठकीनंतर त्यांनी स्वबळाचे विधान केले होते. त्यावरून अजूनही कॉंग्रेस-राष्ट्रवादी कॉंग्रेस आणि शिवसेना यांच्यात मुंबई महापालिका निवडणूक एकत्र लढायची की स्वबळावर यावर एकमत झालेले नाही, असे दिसते.