Ashadhi Wari :मुख्यमंत्र्यांच्या हस्ते विठूरायाच्या पूजेसाठी प्रशासनाचे निवडणूक आयोगाला साकडे

सोलापूर : राज्याचे मुख्यमंत्री एकनाथ शिंदे (Eknath Shinde) आज आषाढी एकादशी निमित्त (Ashadhi Wari) पंढरपूर दौऱ्यावर येत आहेत. मुख्यमंत्र्यांच्या हस्ते रविवारी (10 जुलै) पहाटे विठूरायाची शासकीय महापूजा होणार आहे. राज्यातील नगरपालिका निवडणूक जाहीर झाल्याने आचारसंहिता लागू झाली आहे. (Ashadhi Wari 2022)

आचारसंहिता लागू झाल्याने मुख्यमंत्र्यांच्या या दौऱ्यासाठी परवानगीबाबत जिल्हा प्रशासनाने राज्य निवडणूक आयोगाला पत्र लिहिलं आहे. ही परवानगी निवडणूक आयोगाने दिल्यास मुख्यमंत्र्यांना पंढरपूर दौऱ्यावर येता येणार आहे. निवडणूक आयोगाने परवानगी दिल्यास मुख्यमंत्र्यांना पंढरपूर दौऱ्यावर येता येणार आहे. त्यामुळे निवडणूक आयोगाच्या परवानगीकडे सगळ्याचे लक्ष लागले आहे.

काही वर्षांपूर्वी कार्तिकी यात्रेला अशीच आचारसंहिता असताना तत्कालीन मंत्री चंद्रकांत पाटील यांना शासकीय महापूजेला परवानगी दिली होती. अशीच परवानगी शिंदे यांना मिळू शकते, अशी चर्चा आहे.

1. मुख्यमंत्री एकनाथ शिंदे शनिवारी( ता. ९) रात्री पंढरपूर येथे पोहोचणार होते. पंढरपुरातील शासकीय विश्रामगृह इथे आयोजित 'पर्यावरणाची वारी, पंढरीच्या दारी' या कार्यक्रमाचा समारोप सोहळा होणार आहे.

2. एकादशी दिवशी पहाटे शासकीय महापूजा झाल्यावर पहाटे इस्कॉन आंतरराष्ट्रीय मंदिराचे भूमिपूजन कार्यक्रमास ते उपस्थित राहणार आहेत.

3. सकाळी अकरा वाजता सुंदर माझे कार्यालय, स्वच्छता दिंडी समारोप आणि दुपारी शिवसेना पक्षाच्या मेळाव्यास उपस्थिती लावणार आहेत.

4. मुख्यमंत्री रविवारी दुपारी तीन वाजता सोलापूर विमानतळाकडे रवाना होतील आणि तेथून शासकीय विमानाने मुंबईला येतील. सायंकाळी साडेचार वाजता मुंबई विमानतळ येथे पोहोचतील, तेथून ठाण्याला जातील.