Ajit Pawar Plane Crash : 'जगातल्या कोणत्याच अपघातात ब्लॅक बॉक्स जळालेला नाही...'; अजित पवारांच्या अपघातावर जितेंद्र आव्हाड पहिल्यांदाच बोलले

Ajit Pawar Death Plane Crash : राज्याचे माजी उपमुख्यमंत्री दिवंगत अजित पवार यांच्या अपघाती निधनानंतर विरोधी पक्षासह सत्ताधारी आमदारांकडूनही या अपघाताबाबत शंका उपस्थित केली जात आहे.

अजितदादांच्या विमानाचा अपघात नव्हे तर घातपात असल्याची वक्तव्य नेत्यांकडून केली जात आहेत. या संदर्भात शरद पवारांच्या राष्ट्रवादीचे आमदार रोहित पवार यांनी थेट पत्रकार परिषद घेत अनेक मोठे प्रश्न उपस्थित केले आहेत. त्यांच्या प्रश्नांमुळे लोकांच्या मनात संशयाचं वातावरण निर्माण झालं आहे.

तर या घातपातामध्ये मोठ्या नेंत्यांचा हात असल्याचा आरोपही रोहित पवार यांनी केला आहे. अशातच आता या सर्व अपघाताच्या घडामोडींवर ऐन अधिवेशनाच्या सुरूवातीलाच शरद पवारांच्या राष्ट्रवादीचे नेते जितेंद्र आव्हाड यांनी पहिल्यांदाच आपली प्रतिक्रिया दिली. आव्हाड यांनी देखील रोहित पवारांच्या मागण्यांमध्ये तथ्य असल्याचं वक्तव्य केलं आहे.

शिवाय कोणत्याही परिस्थित ब्लॅक बॉक्स जळलाच कसा? हीच माझी मोठी शंका असल्याचंही आव्हाड म्हणाले. माध्यमांशी संवाद साधताना आव्हाड म्हणाले, विमानाच्या ज्या भागात ब्लॅक बॉक्स ठेवला जातो. तो भाग जशाचा तसा आहे. मग ब्लॅक बॉक्स जळाला कसा? ब्लॅक बॉक्स ११ हजार सेल्सियस पेक्षा जास्त तापमानाशिवाय जळत नाही. तरी सरळ सांगितलं जातं की तो जळाला, मात्र तो कसा जळाला? असे सवाल आव्हाडांनी उपस्थित केला.

यावेळी त्यांनी रोहित पवार मागणी करतायत त्यामध्ये तथ्य असल्याचं म्हटलं. तर संबंधित विमान किती तास उडालं, त्याला ती परवानगी होती का नाही. डीजीसीए नेमकं काय कव्हर करायला बघतंय आणि कोणाच्या दबावाखाली काम करतंय का? हे सर्व प्रश्न समोर येत आहेत.

या प्रकरणाची चौकशीला जेवढा उशीर करतील तेवढा संशयाला वाव मिळणार आहे. ब्लॅक बॉक्स जळाला ही सर्वात मोठी माझी शंका आहे. तर जगातल्या कोणत्याही अपघातात ब्लॅक बॉक्स जळून गेला हे कधीही सांगितलं गेलं नाही, असा मोठा दावा देखील आव्हाड यांनी यावेळी केला आहे. शिवाय शंकेला चौकशीच्या माध्यमातूनच वाव मिळत असेल तर शंका उपस्थित होणारच, असंही आव्हाड यावेळी म्हणाले.