Amit Thackeray On Maratha Reservation : मनोज जरांगेंची राज ठाकरेंवर जिव्हारी लागणार टीका पण अमित ठाकरेंनी मराठ्यांचं मन जिंकलं, थेट आदेश दिला

Amit Thackeray News : राज ठाकरेंनी मनोज जरांगेंच्या आंदोलनावर बोलताना ते मुंबईत का आले याचे उत्तर एकनाथ शिंदे देऊ शकतील, असे म्हटले होते. त्यावरून जरांगेंनी राज ठाकरे कुजक्या कानाचे आहे. भाजपने पोराला पाडलं तरी मानासाठी करत आहे, अशी टीका केली होती. मात्र, अमित ठाकरे यांनी महाराष्ट्र नवनिर्माण सेनेच्या कार्यतकर्त्यांना थेट पत्र लिहून आदेश दिला आहे की, आंदोलनासाठी जमलेले आपले बांधव आहेत त्यांना मदत करा.

आपल्या पत्रात अमित ठाकरे म्हटले आहे की, 'सध्या आपल्या मुंबईत राज्याच्या कानाकोपऱ्यातून आलेले हजारो मराठा बांधव आंदोलनासाठी जमले आहेत. मराठा आरक्षण हा विषय शासनाच्या हाती आहे, त्याचा निकाल काय लागेल हे काळ सांगेल. पण एवढं मात्र नक्की, आज जे इथे उभे आहेत ते आपले बांधव आहेत.'

'हे शेतकरी आहेत, मजूर आहेत, लहानशा जमिनीवर पोट सांभाळणारे आहेत, शिक्षणासाठी धडपडणारे युवक आहेत… म्हणजेच मराठा समाजातील प्रत्येक स्तरातील, प्रत्येक जीवन जगणारी आपलीच माणसं आहेत.

ते आपल्या घरापासून, गावापासून, शेतापासून दूर येऊन इथे आंदोलन करीत आहेत. त्यांना काही कमी पडू नये, त्यांच्या मुलांच्या, आई-वडिलांच्या डोळ्यात पोटाची चिंता दिसू नये, ही जबाबदारी आपली आहे.', असे ते म्हणाले आहेत.

मराठा आंदोलकांना अन्न-पाणी पुरवा,औषधोपचारात कोणतीही अडचण येऊ देऊ नका, त्यांच्या राहण्याची, त्यांच्या सुरक्षिततेची काळजी घ्या. एकही मराठा बांधव असा राहू नये की ज्याला वाटेल की तो मुंबईत एकटा आहे. लक्षात ठेवा, ते आपलेच आहेत. त्यांची लढाई जरी आरक्षणासाठी असली, तरी ते आपली जबाबदारी आहेत.', असे आवाहन मनसे कार्यकर्त्यांना अमित ठाकरेंनी केले आहे.

'आपण महाराष्ट्र सैनिक म्हणून आपली जबाबदारी पूर्ण पार पाडणार आहोत.आपण सर्वजण त्यांच्या पाठीशी खंबीरपणे उभे राहिलो, तर त्यांचं मनोबल दुप्पट होईल.आपला प्रत्येक महाराष्ट्र सैनिक या भावनेनं उभा राहील, ही मला खात्री आहे.', असा विश्वासही अमित ठाकरे यांनी व्यक्त केला आहे.