Nitish Kumar News: विरोधकांची मोट बांधण्यासाठी नितीश कुमारांचं एक पाऊल पुढे; ठाकरे, पवारांची उद्या घेणार भेट

Mumbai : आगामी लोकसभा निवडणुकीच्या पार्श्वभूमीवर भाजपविरोधात विरोधी पक्षांची मजबूत आघाडी बनवण्यासाठी हालचाली सुरू आहेत. यामध्ये नितीश कुमार यांनी पुढाकार घेत विरोधी पक्षाच्या नेत्यांच्या भेटीगाठी सुरू केल्या असल्याचे बोलले जात आहे.

आता बिहारचे मुख्यमंत्री नितीश कुमार आणि उपमुख्यमंत्री तेजस्वी यादव हे शिवसेना (उद्धव बाळासाहेब ठाकरे) पक्षाचे प्रमुख उद्धव ठाकरे आणि राष्ट्रवादीचे अध्यक्ष शरद पवार यांची उद्या मुंबईत भेट घेणार आहेत.

त्यामुळे या भेटी दरम्यान, नितीश कुमार, तेजस्वी यादव, उद्धव ठाकरे, शरद पवार यांच्यामध्ये नेमकी काय चर्चा होणार? याकडे सर्वांचे लक्ष लागले आहे. नितीश कुमार हे मातोश्रीवर जाऊन उद्धव ठाकरे यांची भेट घेणार आहेत. त्यानंतर ते शरद पवार यांचीही भेट घेणार आहेत.

दरम्यान, आगामी लोकसभा निवडणुकीत भाजपविरोधात मजबूत आघाडी बनवण्यासाठी विरोधकांच्या हालचाली सुरू आहेत. याबरोबरच देशात तिसऱ्या आघाडीचीही चर्चा राजकीय वर्तुळात आहे. त्यामुळे नितीश कुमार यांचा हा महाराष्ट्र दौरा विरोधकांच्या दृष्टीने महत्त्वाचा मानला जात आहे.

(Edited By- Ganesh Thombare)