BJP Vs Shivsena : बोर्ड फाडले, लाथा घातल्या, कानाखाली मारल्या... वरळीच्या 5 स्टार हॉटेलमध्ये भाजप-ठाकरेंच्या सेनेत तुफान राडा

BJP Vs Shivsena : मुंबईमध्ये भाजप विरुद्ध शिवसेना उद्धव बाळासाहेब ठाकरे पक्षात तुफान राडा झाला. वरळीतील सेंट रेजिस हॉटेलमध्ये दोन्ही पक्षांचे हजारो कार्यकर्ते आमने-सामने आले होते. कामगार युनियनवरून हा वाद झाल्याची माहिती आहे. दोन्ही बाजूच्या कार्यकर्त्यांनी तिथले पक्षांचे कामगार युनियनचे बोर्ड फाडले, एकमेकांना लाथा घातल्या, कानाखाली मारल्या. भाजप नियमबाह्यरित्या संघटनेची नोंद करत असल्याचा आरोप करत शिवसेना उद्धव बाळासाहेब ठाकरे पक्षाचे कार्यकर्ते विरोधात उतरले होते. पोलिसांनी मध्यस्थी करून दोन्ही बाजूंच्या आक्रमक कार्यकर्त्यांवर ताबा मिळवला.

मिळालेल्या माहितीनुसार, काही दिवसांपूर्वी वांद्रे येथील ताज लँड हॉटेलमध्येही भाजप आणि शिवसेना उद्धव बाळासाहेब ठाकरे पक्षात असाच राडा झाला होता. शिवसेना उद्धव बाळासाहेब ठाकरे प्रणित भारतीय कामगार सेनेच्या कामगारांना भाजप प्रणित अखिल भारतीय कर्मचारी संघटनेत सहभागी होण्यासाठी हॉटेल व्यवस्थापनाकडून दबाव येत असल्याचा दावा करत शिवसेना उद्धव बाळासाहेब ठाकरे पक्षाने आंदोलन केले होते. आमदार अनिल परब यांच्या नेतृत्वात शिवसेनेने हॉटेलबाहेर आंदोलन केले होते.

त्यानंतर अशाच प्रकारे सेंट रेजिस हॉटेलमध्येही याच कारणावरून राडा झाल्याची माहिती आहे. मुंबईमधील अनेक पंचतारांकित हॉटेलमध्ये शिवसेना उद्धव बाळासाहेब ठाकरे प्रणित भारतीय कामगार सेना कार्यरत आहे. अशात काही दिवसांपूर्वी भाजप प्रणित अखिल भारतीय कामगार कर्मचारी संघटनेची स्थापना झाली आहे. या संघटनेत शिवसेना उद्धव बाळासाहेब ठाकरे प्रणित संघटनेतील कामगारांची दिशाभूल करून त्यांच्या सह्या घेऊन संघटनेत सहभागी होण्याबाबत हॉटेल प्रशासनाकडून दबाव येतो, असा आरोप होत आहे.