Cabinet Expansion : एकनाथ शिंदेंचं सरकार बचावल्यानंतर मंत्रिमंडळ विस्ताराबाबत संजय शिरसाट म्हणाले...

Maharashtra Cabinet Expansion : मुख्यमंत्री एकनाथ शिंदे यांना सर्वोच्च न्यायालयाने सर्वात मोठा दिलासा दिला आहे. राज्यपाल यांच्या निर्णयावर ताशेरे ओढताना तत्कालीन मुख्यमंत्री उद्धव ठाकरे यांनी राजीनामा दिला नसता तर आम्ही ठाकरेचं सरकार पूर्वरत केलं असतं, असे न्यायालयाने म्हंटले आहे. त्यामुळेच राज्यात आता पुन्हा मुख्यमंत्री म्हणून एकनाथ शिंदे हे राहणार, हे आता स्पष्ट झाले आहे. (Sanjay Shirsat said about cabinet expansion Maharashtra Statement)

न्यायालयाच्या निर्णयामुळे जरी शिंदे सरकार तूर्तास बचावले असले तरी, शिंदे सरकारच्या सरकार स्थापनेच्या प्रक्रियेवर कठोरे तोशेरे ओढले आहेत. १६ आमदारांच्या अपात्रतेबाबतचा निर्णय आता विधानसभा अध्यक्षांकडे पाठवण्यात आले आहे. असे असले तरी तूर्त तरी शिंदे सरकार बचावले आहे. त्यामुळे शिंदे गटातील आमदारांना आता मंत्रिमंडळ विस्ताराचे वेध लागले आहेत. शिंदे गटाचे आमदार संजय शिरसाट यांनी प्रतिक्रिया दिली आहे.

शिरसाट म्हणाले, आता सरकारचं पूर्ण मंत्रिमंडळ बनणार आहे. आणखी २० आमदार मंत्रिमंडळ विस्ताराच्या प्रतिक्षेत आहेत. या सर्वांना मंत्रिपदासाठी संधी दिली जाईल." स्वतः आमदार संजय शिरसाटही मंत्रीपदाच्या शर्यतीत सर्वात पुढे आहेत.

शिंदे-फडणवीस सरकार तूर्तास तरी कायम राहणार असल्याचे आता स्पष्ट झाले आहे. यामुळे आता शिंदे-फडणवीस सरकारचा मंत्रिमंडळ विस्ताराचा मार्ग मोकळा झाला आहे. राज्य सरकारातील मंत्रिमंडळ विस्तार अखेर पक्का झाल्याची माहिती समोर येत आहे. शिवसेना आणि भाजप (BJP) सरकारचा मंत्रिमंडळ विस्तार १५ मे नंतर होण्याची शक्यता आहे. मंत्रिमंडळ विस्ताराला केंद्रीय गृहमंत्री अमित शाह (Amit Shah) यांनी हिरवा कंदील दाखवल्याची माहिती यापूर्वीच असे वृ्त्त आले होते.

पहिल्या मंत्रिमंडळात शिंदे गट आणि भाजपकडून प्रत्येकी नऊ आमदारांना मंत्रिपदाची संधी देण्यात आली होती. आता शिंदे गटाकडून आमदार बच्चू कडू, आमदार संजय शिरसाट, प्रतोद भरत गोगावले, आमदार प्रताप सरनाईक, आमदार यामिनी जाधव, आमदार रवी राणा यांना मंत्रिमंडळ विस्तारात संधी मिळण्याची शक्यता आहे. यांच्यासह १९ जणांचा मंत्रिमंडळात समावेश होण्याची शक्यता आहे.