न्यायालयाचा दणका! शेअर बाजाराच्या माजी प्रमुखांचा तुरुंगातील मुक्काम वाढला

नवी दिल्ली : राष्ट्रीय शेअर बाजाराच्या (NSE) माजी व्यवस्थापकीय संचालिका व मुख्य कार्यकारी अधिकारी चित्रा रामकृष्ण (Chitra Ramkrishna) यांना केंद्रीय अन्वेषण विभागाने (CBI) अटक केली आहे. आता त्यांचा तुरुंगातील मुक्काम आणखी वाढला आहे. न्यायालयाने रामकृष्ण यांच्या न्यायालयीन कोठडीत 11 एप्रिलपर्यंत वाढ केली आहे. (Share Market News)

चित्रा रामकृष्ण यांनी सीबीआय चौकशीत उडवाउडवीची उत्तरे दिली होती. त्या तपासात सहकार्य करीत नव्हत्या. यामुळे रामकृष्ण यांना सीबीआयने 6 मार्चला अटक केली होती. सुरवातीला त्या सीबीआय कोठडीत होत्या. नंतर त्यांची रवानगी सध्या न्यायालयीन कोठडीत झाली. त्यांच्या न्यायालयीन कोठडी 14 दिवसांची वाढ करण्यात आली आहे. रामकृष्ण यांच्या हस्ताक्षराचे नमुने मिळावेत, अशी मागणी सीबीआयने न्यायालयाकडे केली आहे. यावर न्यायालय लवकरच निर्णय सुनावणार आहे. मागील सुनावणीवेळी रामकृष्ण यांनी घरचे जेवण मिळावे, अशी मागणी न्यायालयात केली होती. न्यायालयाने ही मागणी फेटाळून लावली होती. तुम्ही व्हीआयपी कैदी नाही. प्रत्येक कैदी समान आहे, असेही न्यायालयाने फटकारले होते. त्यांना हनुमान चालिसा आणि भगवद्गीता या ग्रंथांची प्रत जवळ बाळगण्यास न्यायालयाने परवानगी दिली होती. (NSE Former CEO Chitra Ramkrishna News)

काही दिवसांपूर्वी रामकृष्ण यांच्यावर प्राप्तिकर विभागाने छापे टाकले होते. नंतर त्यांची सीबीआयने चौकशी केली होती. रामकृष्ण यांच्या भोवतीचा केंद्रीय तपास यंत्रणांनी फास आवळला आहे. सीबीआयने रामकृष्ण यांच्यासह एनएसईचे माजी मुख्य कार्यकारी अधिकारी रवी नारायण आणि माजी चीफ ऑपरेटिंग ऑफिसर आनंद सुब्रह्मण्यम यांच्या विरोधात लुकआऊट नोटीस बजावली आहे. यामुळे त्यांना आता परदेशात पलायन करता येणार नाही. रामकृष्ण यांच्या संपत्तीसह कागदपत्रांची तपासणी करण्यात येत आहे. त्यांनी गोपनीय माहिती योगीला दिल्याचा दाट संशय आहे.

या प्रकरणी ‘एनएसई’चे माजी चीफ ऑपरेटिंग ऑफिसर आनंद सुब्रह्मण्यम (Anand Subramanian) यांना सीबीआयने 24 फेब्रुवारीला अटक केली आहे. सीबीआयने त्यांची तीन दिवस चौकशी केली होती. त्यातून अनेक धक्कादायक खुलासे समोर आले आहेत. तोच कथित योगी असल्याचेही स्पष्ट झाले होते. तोच योगी बनून चित्रा यांच्याशी ई-मेलच्या माध्यमातून संपर्क साधत होता. सुब्रह्मण्यम यांची एनएसईमध्ये नियुक्ती ही चित्रा यांनी योगीच्या सांगण्यावरून घेतलेल्या वादग्रस्त निर्णय होता. तसेच, वेतन देतानाही अनियमितता दिसून आली आहे, असे सेबीच्या चौकशीत समोर आलं होतं. (Share Market Updates)