Deepak Kesarkar : केसरकरांनी थेट शिक्षक-पदवीधर निवडणुकींचा निकाल सांगितला!

Deepak Kesarkar : शिवसेना कुणाची? धनुष्यबाण हे चिन्हं कुणाला? हा सत्तासंघर्ष सर्वोच्च न्यायालयात आणि केंद्रीय निवडणूक आयोगाच्या पायरीवर पोहचला आहे. उद्या दि. ३० जानेवारी रोजी आयोगात याची सुनावणी पार पडणार आहे, याप्रकरणी उद्या निकाल येण्याची अधिक शक्यता आहे. मात्र यावर आता शालेय शिक्षण मंत्री दिपक केसरकर यांनी धनुष्यबाण आम्हालाच मिळणार असा दावा केला आहे.

केसरकर यांनी मुंबईत माध्यमांशी संवाद साधला. यावेळी त्यांना उद्या होणाऱ्या सत्तासंघर्षाच्या सुनावणीबद्दल ते म्हणाले, "सत्यमेव जयते, बाळासाहेब ठाकरे यांच्या विचारासोबत शिवसेना आणि एकनाथ शिंदे साहेब राहिले. बाळासाहेबांची शिवसेनाच शिवसेना आहे.त्याच्यामुळे धनुष्यबाण हे चिन्हं आमचंच आहे, याची मला खात्री आहे. आम्हाला न्याय मिळेल, अशी आम्हाला अपेक्षा आहे."

विधानसभा निवडणुकीतील शिक्षक व पदवीधर जागेबाबत त्यांना विचारले असता केसरकर म्हणाले, "चार जागेवर भाजप आणि एका जागेवर अपक्ष निवडून येथील, अशी आम्हाला अपेक्षा आहे." अप्रत्यक्षपणे त्यांनी नाशिक पदवीधर जागेवर अपक्ष असलेल्या सत्यजीत तांबे हे विजयी होतील असे सुतोवाच केले.

ते पुढे म्हणाले, "बंजारा समाजाच्या सेवालाल महाराजांचं पूजन करत असतो. वेगवेगळ्या देवतांची मंदिरे पोहरादेवी येथे आहेत. या परिसराचा विकास व्हावा यासाठी आमदार संजय राठोड यांनी प्रयत्न केले. राठोड यांनी पोहरादेवी देवस्थान परिसराच्या विकासासाठी जे प्रयत्न केलेत त्याला तोड नाही. बंजारा समाजाचं संस्कृती जपण्याचं काम त्यांनी केलं आहे. सेवालाल महाराजांच्या अश्वारूढ पुतळ्याचं उद्घाटन मुख्यमंत्री एकनाथ शिंदे, उपमुख्यमंत्री देवेंद्रे फडणवीस यांच्या उपस्थितीत होणार आहे, अशी माहिती त्यांनी दिली.