Devendra Fadanvis : 'पत्रकाराने विचारलं, 'तुमचं वजन कमी झालंय का?' ; फडणवीसांचं अनोखं उत्तर..

मुंबई : राज्याचे उपमुख्यमंत्री व भाजपचे प्रमुख नेते देवेंद्र फडणवीस आपल्या हजरजबाबीपणामुळे ओळखले जातात. एका वृत्तवाहिनीने फडणवीस यांची दिर्घ मुलाखत घेतली. यावेळी काही माध्यम प्रतिनिधींनी त्यांना त्यांच्या शारीरीक व राजकीय वजनाबद्दल प्रश्न विचारले, यावेळी त्यांनी या प्रश्नांची आपल्या वेगळ्याच शैलीत उत्तर दिले. यामुळे उपस्थितांमध्ये एकच हशा पिकला.

"तुम्ही तुमचं शारीरीक वजन कमी केलंय का? काहीतरी जादू करून तुम्ही तुमचं शारीरीक वजन कमी केलंय, असं दिसतं. तुम्ही मुख्यमंत्री राहिला आहात. आता उपमुख्यमंत्री आहात, यामुळे तुमच्या शारीरीक वजनाप्रमाणे तुमचं राजकीय वजन ही कमी झालं आहे का? असा थेट प्रश्न माध्यम प्रतिनिधीने फडणवीसांना विचारला.

यावर उत्तर देताना फडणवीस म्हणाले की, माझं शारीरीक वजन किती कमी झालंय हे मला माहिती नाही. मात्र माझ्या टेलरला मी टाईट केलं आहे. यामुळे टेलरने असे कपडे शिवायला सुरू केलं की, ज्याने वजन कमी दिसेल. आणि राजकारणात वजन तुम्ही कोणत्या पदावर आहात याने ठरत नाही. आपलं वजन राजकारणात आपण कोण आहोत, यावरून ठरत असतं. महाराष्ट्रात कोणालाही विचारा, तुम्हाला माझं वजन कमी झालंय की जास्त ते कळेल, असे फडणवीस म्हणाले.

दरम्यान, पाच वर्ष आपल्या मुख्यमंत्रीपदाचा कार्यकाल पूर्ण केलेल्या फडणवीस यांना आताच्या सरकारमध्ये उपमुख्यमंत्रीपदावर बसावे लागल्यामुळे विरोधकांकडून वेळोवळी त्यांना हिणवण्यात येत होते. या मुद्द्यावर त्यांना डिवचण्यात येत होतं. यावर आता खुद्द फडणवीसांनी एकप्रकारे प्रत्युत्तर दिले. आहे.