Disha Salian case : दिशा सालियान प्रकरणात आदित्य ठाकरेंना क्लिन चिट मिळताच राऊतांचा CM फडणवीसांसह नितेश राणेंवर हल्लाबोल

Mumbai News, 03 Jul : दिशा सालियन आत्महत्या प्रकरणी मोठी अपडेट समोर आली आहे. मालवणी पोलिसांनी सादर केलेल्या प्रतिज्ञा पत्रात दिशा सालियनची हत्या झाली तसेच तिच्यावर लैंगिक अत्याचार झाल्याचे पोस्टमार्टममध्ये सिद्ध झाले नसल्याचे स्पष्ट केले आहे.

तसेच या प्रकरणात आमदार आदित्य ठाकरे यांच्यावर करण्यात येणाऱ्या आरोपींची पुष्टी करणारे कोणतेही पुरावे नाहीत, असं सांगत पोलिसांनी आदित्य ठाकरेंना क्लिन चिट दिली आहे. दिशा सालियन प्रकरणात आदित्य यांना क्लिन चिट मिळताच ठाकरेंच्या शिवसेनेचे नेते संजय राऊत यांनी मुख्यमंत्री देवेंद्र फडणवीस यांच्यासह मंत्री नितेश राणेंवर सडकून टीका केली आहे.

आदित्य यांना क्लिन चिट मिळाली असून आता देवेंद्र फडणवीस यांनी माफी मागितली पाहिजे. तर नेपाळ्यासारखा बडबडणाऱ्या राणेंच्या मुलाने नाक घासून माफी मागितली पाहिजे, असं म्हणत त्यांनी नितेश राणेंवर हल्लाबोल केला आहे.

संजय राऊत म्हणाले, दिशा सालियन प्रकरणात पोलिसांचा क्लिन चिट रिपोर्ट आला आहे. हे पोलिस आमचे नाहीत, एसआयटी आमची नाही ती तुम्हीच स्थापन केली होती. आदित्य ठाकरे शिवसेनेचे युवा नेते आहेत. त्यांनी मंत्री म्हणून चांगलं काम केलं. त्यांचं नेतृत्व खच्ची करण्याचं काम केलं.

मात्र, आता सत्य समोर आलं आहे. आता काय करणार? असा सवाल करत सर्वात आधी देवेंद्र फडणवीस यांनी माफी मागितली पाहिजे. शिवाय तो जो राणेंचा मुलगा आहे ना. तो एवढा एवढा, नेपाळ्यासारखा बडबडणाऱ्या राणेंच्या मुलाने नाक घासून माफी मागितली पाहिजे.

ज्यांनी ज्यांनी आरोप केले आणि बदनामी केली त्यांनी नैतिकतेच्या मुद्द्यावर माफी मागितली पाहिजे. तुम्ही यंत्रणेचा आणि सत्तेचा गैरवापर करून एखाद्याचं आयुष्य उद्ध्वस्त करता, बदनाम करता. पण लक्षात ठेवा तुमच्यावर एक दिवस डाव उलटला जाईल. तेव्हा आम्ही देखील बघून घेऊ, असा इशाराही राऊतांनी यावेळी सत्ताधाऱ्यांना दिला.