शिवसेना केंद्रीय मंत्र्यांना पुरुन उरली; कपिल पाटलांच्या शहापुरात शिंदे वरचढ

शहापूर : भाजपचे केंद्रीय राज्यमंत्री कपिल पाटील (Kapil Patil) यांच्या घरच्या मैदानावरील शहापूर नगपंचायतीमध्ये शिवसेनेचे मंत्री एकनाथ शिंदे (Eknath Shinde) यांनी आपले वर्चस्व कायम राखले आहे. शहापूर नगरपंचायत निवडणुकीत शिवसेनेचे पुन्हा एकदा सत्ता आली आहे. १७ पैकी १० जागांवर शिवसेनेने विजय मिळवला आहे, तर ७ जागांवर भाजपाला यश आले आहे. शिवसेनेचा हा विजय पालकमंत्री एकनाथ शिंदे यांनी केलेल्या विकास कामांमुळेच झाला असल्याचे शिवसेना जिल्हा प्रमुख प्रकाश पाटील यांनी सांगितले

शहापूर नगरपंचायत निवडणुकीत १७ जागांसाठी एकूण ४६ उमेदवार रिंगणात उतरले होते. या ठिकाणी मुख्य लढत ही शिवसेना आणि भाजप यांच्यात पाहायला मिळाली. एकूण २ टप्प्यात पार पडलेल्या मतदानाचा निकाल आज जाहीर झाला. निकालात शिवसेनेने १७ जागांपैकी १० जागांवर विजय मिळवत शहापुरचा गड पुन्हा राखला. तर कॉंग्रेस (Congress) आणि राष्ट्रवादी कॉंग्रेसचा (Ncp) एकही उमेदवार निवडून येवू शकला नाही.

यापुर्वी शहापूर नगरपंचायतीत शिवसेना १०, राष्ट्रवादी ३, भाजप ३, अपक्ष १ असे पक्षीय बलाबल होते. यापैकी भाजपचे २ नगरसेवक आणि १ अपक्ष नगरसेवकाने शिवसेनेत प्रवेश केला होता. या निवडणुकीत शिवसेना विरुद्ध भाजप अशी लढत पाहायला मिळाली. निवडणुकीत शिवसेनेचे नेते आणि नगरविकास मंत्री एकनाथ शिंदे आणि भाजपचे नेते आणि केंद्रीय राज्यमंत्री कपिल पाटील यांची प्रतिष्ठा पणाला लागली होती.

दरम्यान जरी शहापुरमध्ये शिवसेनेने गड राखला असला तरी आजच्या निकालानंतर राज्यात भाजपला सर्वाधिक जागा मिळाल्या आहेत. भाजपला एकूण १६४९ जागांपैकी भाजपला ३८४, राष्ट्रवादीला ३४४, काँग्रेसला ३१६ तर शिवनेला २८४ जागा मिळाल्या आहेत.