MNS News : शिरोळे,सातपुते, शेडगे यांच्यासह पाचजण मनसेचे नवे सरचिटणीस

Raj Thackeray : गुढीपाडव्यानिमित्त आज महाराष्ट्र नवनिर्माण सेनेचे अध्यक्ष राज ठाकरे यांच्या सभेकडे राज्याचे लक्ष लागले होते. शिवतिर्थावर त्यांच्या सभेची जय्यत तयारी झालेली आहे. तेथे नागरिकांनी मोठी गर्दी केली होती. या सभेत मनसेच्या काही पदाधिकाऱ्यांच्या निवडी करण्यात आल्या. त्यात पुण्यातील तीन पदाधिकाऱ्यांचा समावेश आहे.

राज ठाकरे (Raj Thackeray) यांच्या उपस्थित आज पक्षातील काही प्रमुख नेत्यांवर जबाबदारीची पदे देण्यात आली. मनसेच्या १७ वर्षांच्या वाटचालीनंतर या नियुक्त्या करण्यात आल्या आहेत. यात पुण्यातील बाळा शेडगे, गणेश सातपुते, रणजित शिरोळे यांचा समावेश आहे. या सभेत संदीप देशपांडे (Sandip Deshpande) यांची नेतेपदी निवड करण्यात आली. अविनाश जाधव आणि विदर्भातील उपाध्यक्ष राजीव उंबरकर यांच्याकडेही नेतेपदाची जबाबदारी देण्यात आली आहे.

चित्रपटसेनेचे अमेय खोपकर, योगेश परुळेकर, बाळा शेडगे, गणेश सातपुते, रणजित शिरोळे यांच्याकडे सरचिटणीसपदाची जबाबदारी देण्यात आल्या आहेत. नाशिकच्या उपाध्यक्षपदी पराग क्षिंत्रे यांची निवड करण्यात आली आहे. या सर्वांना मनसे अध्यक्ष राज ठाकरे (Raj Thackeray) यांच्या हस्ते नियुक्तीपत्रे देण्यात आली.

दरम्यान, अॅडगुरू अशी ओळख असेले भरत दाभोळकर (Bharat Dabholkar) यांनी मनसेत प्रवेश केला. यावेळी त्यांनी समोरील जनसागर पाहून बाळासाहेबांची आठवण झाल्याचे सांगितले.