Shivsena UBT-MNS Alliance : 'मनसे'बाबत 'त्या' निर्णयासाठी माजी नगरसेवकांकडून उद्धव ठाकरेंना हिरवा झेंडा! राजीनामा दिलेल्या तेजस्विनी घोसाळकरही बैठकीला

Shiv Sena MNS Merger: आगामी महापालिकेसाठी उद्धव ठाकरे कामाला लागले आहेत. बुधवारी त्यांनी मुंबईतील माजी नगरसेवकांची बैठक बोलावली होती. शिवेसना उद्धव बाळासाहेब ठाकरे पक्ष आणि मनसेच्या युतीबाबत चर्चा आहेत. याबाबत मनसेसोबत युती करावी का? असा प्रश्न उद्धव ठाकरेंनी माजी नगरसेवकांना विचारला. पक्षाच्या अडचणीच्या काळात तुम्ही सोबत राहिला त्यामुळे तुम्हाला विचारल्याशिवाय निर्णय होणार नसल्याचे देखील ठाकरे म्हणाले.

मनसेसोबत युती करण्याच्याबाबत माजी नगरसेवकांनी सकारात्मक प्रतिसाद दिला. जर मनसेसोबत युती केली तर त्याचा फायदाच होईल, अशा भावना देखील माजी नगरसेवकांनी बोलून दाखवल्या. दरम्यान, गेल्या महिन्यात शिवसेना उद्धव बाळासाहेब ठाकरे पक्षाच्या सर्वपदांचा राजीनामा दिलेल्या माजी नगरसेविका तेजस्विनी घोसाळकर या देखील या बैठकीला उपस्थित होत्या.

गेल्या महिन्यात आपल्याकडे दुर्लक्ष होत असल्याचे कारण देत तेजस्विनी घोसाळकर यांनी राजीनामा दिला होता. त्यानंतर त्या मातोश्रीवर उद्धव ठाकरेंची (Uddhav Thackeray) भेट देखील घेऊन गेल्या होत्या. दरम्यान, तेजस्विनी यांचे सासरे विनोद घोसाळकर यांनी भाजप किंवा एकनाथ शिंदेंच्या शिवसेनेत प्रवेश करण्याबाबत आपल्या कुटुंबावर दबाव असल्याचे म्हटले होते. दरम्यान, तेजस्विनी यांनी मातोश्रीवर झालेल्या बैठकीला हजर होता ही माहिती देखील विनोद घोसाळकर यांनीच दिली आहे.

घोसाळकर कुटुंबीय ठाकरेंसोबतच

विनोद घोसाळकर हे विधानसभा निवडणुकीत शिवसेना उद्धव बाशासाहेब ठाकरे पक्षाचे उमेदवार होते. मात्र, त्यांना पराभवाचा सामना करावा लागला होता. तेव्हापासून विनोद घोसाळकर आणि त्यांची सून तेजस्विनी यांनी भाजप (BJP) किंवा एकनाथ शिंदेंच्या शिवसेनेत प्रवेश करावा यासाठी प्रयत्न केले जात होते. मात्र, विनोद घोसाळकर यांनीच स्पष्ट केले आहे की ते ठाकरेंसोबत कायम राहणार आहेत.