दूध ओतल्याने ग्राहक पंचायतीने केला राजू शेट्टींचा निषेध

मुंबई : दूध बंद करण्याचे आंदोलन ग्राहकविरोधी असून त्याबद्दल खासदार राजू शेट्टी यांना एसएमएस करून निषेध नोंदवण्याचे आवाहन मुंबई ग्राहक पंचायतने केली आहे. आज या संदर्भात जारी केलेल्या पत्रकात पंचायतचे ऍड. शिरीष देशपांडे यांनी निषेधाचे आवाहन केले आहे.

दुधासारखे नैसर्गिक व पोषक अन्न फेकुन देणे या देशाचे जबाबदार ग्राहक म्हणून आम्हाला अजिबात मान्य नाही. आज या देशात बरीच जनता अर्धपोटी आहे व बालकांच्या कुपोषणाचे प्रमाण लक्षणीय आहे. अशावेळी दूध ओतून टाकणे, दुधाच्या टॅंकर्सना आगी लावणे व मुंबई सारख्या शहराचे दूध रोखण्याचा विध्वंसक मार्ग अवलंबणार्या आंदोलकांचा व त्यांच्या बेजबाबदार नेत्यांचा आम्ही ग्राहक म्हणून *त्रिवार निषेध* करतो. 

दूध उत्पादक शेतकर्यांना दूधाचा योग्य भाव मिळालाच पाहिजे. परंतु त्यासाठी ग्राहकांना वेठीस धरण्याची गरज नाही. हे आंदोलन अशाच बेजबाबदारपणे चालू राहिले तर आम्ही ग्राहकही ते सहन करणार नाहीत याची सर्वांनी नोंद घ्यावी.