आता सोमय्यांचा पाय खोलात! मुलाची अटकपूर्व जामिनासाठी न्यायालयात धाव

मुंबई : निकॉन इन्फ्रा कन्स्ट्रक्शन कंपनी कुणाची आहे? ही कंपनी भाजप (BJP) नेते किरीट सोमय्या (Kirit Somaiya), त्यांचे कुटुंबीय आणि त्यांचा मुलगा नील यांची आहे. त्यांचा भागीदार पीएमसी बँक गैरव्यवहारातील आरोपी राकेश वाधवा आहे. पीएमसी गैरव्यवहारातील पैशाची गुंतवणूक त्याने केली, असा गंभीर आरोप शिवसेना (Shivsena) नेते खासदार संजय राऊत (Sanjay Raut) यांनी केला होता. या प्रकरणी नील सोमय्या (Neil Somaiya) यांना अटक होण्याची शक्यता असून, त्यांनी अटकपूर्व जामिनासाठी न्यायालयात धाव घेतली आहे.

संजय राऊत यांनी या प्रकरणाची कागदपत्रे मुख्यमंत्री उद्धव ठाकरे आणि आर्थिक गुन्हे शाखेकडे सोपवली होती. याच प्रकरणात नील सोमय्यांना अटक होण्याची शक्यता आहे. त्यामुळे नील सोमय्या यांनी अटकपूर्व जामिनासाठी न्यायालयात धाव घेतली आहे. नील यांनी मुंबई सत्र न्यायालयात अटकपूर्व जामिनासाठी अर्ज केला आहे. या अर्जावर आजच सुनावणी होण्याची शक्यता आहे. त्यामुळे आता न्यायालय नील यांना दिलासा देते की नाही याकडे लक्ष लागले आहे. केंद्रीय यंत्रणांनी महाविकास आघाडीच्या नेत्यांवर कारवाई केल्यानंतर आता राज्य सरकारही उत्तर देण्याच्या तयारीत असल्याचे समजते. त्यामुळे लवकरच नील यांच्यावर कारवाई होऊ शकते.

खासदार राऊत यांनी नुकताच पत्रकार परिषदेत सोमय्यांचा पर्दाफाश केला. ते म्हणाले होते की, निकॉन इन्फ्रा कन्स्ट्रक्शन कंपनी कुणाची आहे? ही कंपनी किरीट सोमय्या, त्यांचे कुटुंबीय आणि त्यांचा मुलगा नील यांची आहे. त्यांचा भागीदार पीएमसी बँक गैरव्यवहारातील आरोपी राकेश वाधवा आहे. पीएमसी गैरव्यवहारातील पैशाची गुंतवणूक त्याने केली. यातून वसई तालुक्यातील गोखीवरे येथे हजारो कोटींचा प्रकल्प उभारण्यात आला. पीएमसी बँक गैरव्यवहार प्रकरणी सोमय्यांनी ब्लॅकमेल करून कोट्यवधीची जमीन घेतली. देवेंद्र लधाणी या फ्रंटमनच्या नावावर ही जमीन घेण्यात आली आणि पैसेही घेण्यात आली. चारशे कोटींची जमीन फक्त साडेचार कोटींना घेण्यात आली. एकूण दोन जमिनी घेण्यात आल्या.दुसरी जमीन सात कोटींनी घेण्यात आली.

या जमिनीवर जो प्रकल्प उभा आहे, त्या कंपनीचा संचालक नील सोमय्या आहे. निकॉन फेज 1 फेज 2 हे हजारो कोटींचे प्रकल्प उभारले आहेत. हा सगळा पैसा पीएमसी बँकेतील आहे. या प्रकल्पाला पर्यावरण विभागाची मंजुरी नाही. हरित लवादाने यात लक्ष घातल्यास दोनशे कोटींचा दंड होऊ शकतो. यात पर्यावरण मंत्री आदित्य ठाकरे यांनी ताबडतोब लक्ष घालावे, असे माझे आवाहन आहे. सगळ्या प्रकल्पाचे परवाने रद्द करावेत. पीएमसी गैरव्यवहाराचा तपास करणाऱ्या आर्थिक गुन्हे शाखेने किरीट अन् नील सोमय्याला ताबडतोब अटक करावी, असेही राऊत म्हणाले होते.

पीएमसी गैरव्यवहार आधीच माहिती सोमय्याच्या जवळच्या लोकांनी आधीच पैसे काढून घेतले. हा सोमय्या भाजपचा मुंबईतील चेहरा आहे. तो आता भ्रष्टाचारा विरोधात लढाई लढत आहे. पत्रा चाळीतले पैसेही सोमय्यांच्या कंपनीत गेले. याची सगळी चौकशी महाराष्ट्राच्या मुख्यमंत्र्यांनी करावी. हे सगळे मी पाच टक्के सांगितले आहे. बाकीचे पेपर मी ईडीकडे पाठवले आहेत. सोमय्यांचे भ्रष्टाचाराचे सगळे कागद मी तीन वेळा ईडीला पाठवले आहेत, असेही राऊत यांनी सांगितले होते.