Ajit Pawar: नगरपंचायती, नगरपरिषदा जिंकण्यासाठी राष्ट्रवादी कामाला लागली; बैठकांचा सपाटा सुरु

Mumbai News : स्थानिक स्वराज्य संस्था निवडणुका जाहीर होण्यापूर्वी राष्ट्रवादी काँग्रेस पक्षाने बैठकांचा सपाटा लावला आहे. राष्ट्रवादी काँग्रेस पक्षाचे राष्ट्रीय अध्यक्ष व उपमुख्यमंत्री अजित पवार यांनी मुंबईत पक्षाच्या जिल्हा व तालुका समित्यांसोबत बैठका सुरू केल्या आहेत. शुक्रवारपर्यंत या बैठका सुरु राहणार आहेत.

पक्षाचे प्रदेशाध्यक्ष सुनील तटकरे, पक्षाचे वरिष्ठ नेते धनंजय मुंडे, नरहरी झिरवाळ, रूपाली चाकणकर आणि संजय खोडके आदी बैठकीला उपस्थित होते.

तटकरे म्हणाले, ""या बैठका म्हणजे केवळ आढावा नव्हे, तर पक्षातील संवाद आणि समन्वय अधिक प्रभावी करण्याचा सातत्यपूर्ण प्रयत्न आहे. स्थानिक प्रश्नांना वेळीच दखल घेऊन त्यावर मार्ग शोधून जिल्हा स्तरावर संघटनात्मक बळ वाढविणे हाच उद्देश आहे,"

राष्ट्रवादी काँग्रेसच्या जिल्हा व तालुका समित्यांच्या प्रतिनिधींशी सुनील तटकरे यांनी संवाद साधला. संघटन मजबूत करणे आणि स्थानिक निवडणुकांमध्ये राष्ट्रवादी काँग्रेसच्या विजयासाठी रणनीती काय असेल याबाबत तटकरे यांनी सर्व कार्यकर्त्यांना मार्गदर्शन केले.

पक्ष नेतृत्वाकडून सर्वतोपरी पाठिंबा दिला जाईल, स्थानिक नेतृत्वाला सर्वेक्षण अहवाल, प्रचार पथके आणि आवश्यक संसाधनांच्या माध्यमातून पूर्ण सहकार्य दिले जाईल, असे तटकर यांनी सांगितले. बैठकीत विद्यमान संघटन रचना, स्थानिक आव्हाने आणि राज्य व जिल्हा नेतृत्वातील समन्वय या मुद्यांवर चर्चा करण्यात येत आहे.

पदाधिकारी आणि कार्यकर्त्यांना नागरिकांच्या समस्या जाणून घेण्याचे आवाहन केले आहे. अजित पवार यांनी नुकतीच दौरा केला. धुळे, नंदुरबार, जळगाव, रायगड, जळगाव, कोल्हापूर, नाशिक, अहिल्यानगर जिल्ह्यातील नेत्यांच्या भेटी घेतल्या. स्थानिक समस्या कशा सोडवता येतील, यासाठी स्थानिकांशी संवाद साधा, असा सल्ला उपमुख्यमंत्री अजित पवार यांनी दिला.