CAG चौकशी राजकीय सुडबुद्धीतून ? ; मुख्यमंत्री शिंदे म्हणाले..

CM Eknath Shinde : कोरोना काळात मुंबई महापालिकेत झालेल्या १२ हजार कोटीच्या कामाची कॅग(कॅन्टोलर ऑफ ऑडिटर जनरल ऑफ इंडिया) या स्वायत्त संस्थेच्या माध्यमातून चौकशी करण्याचे आदेश राज्य सरकारने दिले आहेत. यावर मुख्यमंत्री एकनाथ शिंदे यांनी स्पष्टीकरण दिले आहे.ते मुंबईत माध्यमांशी बोलत होते. (maharashtra government latest news)

विधीमंडळ अधिवेशनात मुंबई महापालिकेच्या कारभाराची चौकशी करणार असल्याचे उपमुख्यमंत्री देवेंद्र फडणवीस यांनी सांगितले होते. कोरोना काळात मुंबई महापालिकेच भष्ट्राचार झाल्याचा आरोप यापूर्वीही भाजपने केला आहे.

मुख्यमंत्री एकनाथ शिंदे म्हणाले, "मुंबई महापालितकेच्या कारभाराची चौकशी कॅग करणार आहे. मात्र राजकीय सुडबुद्धीतून ही कारवाई करण्यात येणार नाही.

कुठल्याही राजकीय आकसापोटी ही चौकशी केली जाणार नाही, अहवाल आल्यानंतर त्याबाबत निर्णय घेऊ," "कोरोना काळात मुंबई महापालिकेत भष्ट्राचार झाला की नाही हे चौकशीत समोर येईल," असे मुख्यमंत्र्यांनी स्पष्ट केलं.

मुंबई महानगरपालिकेतील कोरोना केंद्राचे वाटप, त्यासाठी लागणाऱ्या वस्तूंची झालेली खरेदी त्यांचे नियमबाह्य पद्धतीने झालेले कामाचे वाटप हे सारे चौकशीच्या फेऱ्यात आणले जाणार आहेत. कोरोना काळात लोकांची गैरसोय होऊ नये, यासाठी टेंडर प्रक्रिया न राबवता तातडीने सोयीसुविधा उभारण्याला आणि वस्तूंची खरेदी करण्याला प्राधान्य देण्यात आले होते. मात्र या अधिकाराचा गैरवापर करून मोठ्या प्रमाणावर भ्रष्टाचार झाल्याचा आरोप वारंवार भारतीय जनता पक्षाकडून करण्यात आला होता.

या आरोपातील सत्यता जनतेसमोर यावी यासाठी लवकरात लवकर कॅगमार्फत या सर्व प्रकरणांची चौकशी करून अहवाल सादर करण्याचे आदेश राज्य सरकारने कॅगला दिले आहेत. कोरोनाकाळात केंद्र उभारण्यातील गैरव्यवहार, दहिसर येथील जमीन खरेदी प्रकरण, आँक्सीजन निर्मितीचे प्रकल्प, पालिका अधिकाऱ्यांनी आपलीच कंपनी स्थापन करुन पालिकेचे कामे घेतली, आदी आरोपांची चौकशी आता कॅगमार्फेत करण्यात येणार आहे.

मुंबई महापालिका शिवसेनेच्या ताब्यातून घेण्यासाठी शिंदे-फडणवीस यांनी रणनीती आखली आहे. ठाकरे गटाला पुन्हा झटका देण्याच्या तयारी शिंदे-फडणवीस सरकारने केली असल्याचे दिसते.