Congress Thackeray Alliance : राजकारणातील आजची सर्वात मोठी बातमी; काँग्रेसच्या देशपातळीवरील मातब्बर नेत्याचे ठाकरेंशी गुफ्तगू, मनसेवर फैसला?

Maharashtra politics latest news : आगामी महापालिका निवडणुकांच्या पार्श्वभूमीवर सध्या राज्याच्या राजकारणात अनेक घडामोडी घडत आहेत. प्रामुख्याने मुंबई उद्धव ठाकरे आणि राज ठाकरे यांची युती होणार आहे. त्याची अद्याप अधिकृत घोषणा झालेली नाही. उद्धव ठाकरे सध्या महाविकास आघाडीत असून काँग्रेसने मनसेला कडाडून विरोध करत एकला चलोचा नारा दिला आहे. या घडामोडींच्या पार्श्वभूमीवर आज काँग्रेसच्या राष्ट्रीय पातळीवरील नेत्याने आत उद्धव ठाकरेंची भेट घेतली.

शिवसेना उद्धव बाळासाहेब ठाकरे पक्ष आणि महाराष्ट्र नवनिर्माण सेना हे दोन पक्ष आगामी महापालिका निवडणुकांसाठी एकत्रित येणार आहेत. लवकरच याबाबत अधिकृत घोषणा होण्याची शक्यता आहे. पण काँग्रेसने महाविकास आघाडीत मनसेला घेण्यास विरोध केला आहे. मात्र, उद्धव ठाकरे त्यासाठी आग्रही असल्याची चर्चा आहे.

काँग्रेसच्या भूमिकेमुळे आघाडीचे घोडे असल्याचे राजकीय गोटातून सांगितले जात आहे. त्यातच आज काँग्रेसचे ज्येष्ठ नेते व राज्यसभेचे खासदार दिग्विजय सिंह उद्धव ठाकरेंच्या भेटीसाठी मातोश्रीवर दाखल झाले आहेत. त्यांच्यामध्ये आघाडीबाबत चर्चा होण्याची दाट शक्यता व्यक्त केली जात आहे. मनसेला आघाडीत घेण्याबाबत, मुंबईत काँग्रेससोबत आघाडी यासाठी ठाकरेंकडून जोर दिला जाऊ शकतो.

दिग्विजय सिंह यांच्याकडूनही या राजकीय संकटातून मार्ग काढण्यासाठी प्रयत्न केला जाऊ शकतो. आजच्या भेटीतील चर्चेचा निरोप दिग्विजय सिंह यांच्याकडून पक्षश्रेष्ठींना कळविला जाईल. त्यानंतर महाराष्ट्रातील नेत्यांशी चर्चा करून मनसेबाबतचा अंतिम निर्णय घेतला जाऊ शकतो, अशी चर्चा राजकीय वर्तूळात सुरू झाली आहे.

दरम्यान, काँग्रेसने काही दिवसांपूर्वीच मुंबई महापालिकेच्या निवडणुकीसाठी एकला चलोचा नारा दिला आहे. मुंबईतील नेत्यांनी राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांच्याही भेट घेत आघाडीबाबत चर्चा केली होती. दुसरीकडे शरद पवार हे मनसेला आघाडीत घेण्यासाठी सकारात्मक असल्याची चर्चा आहे. त्यामुळे काँग्रेसची कोंडी झाल्याचेही मानले जात आहे. यापार्श्वभूमीवर दिग्विजय सिंह आणि उद्धव ठाकरेंच्या भेटीला महत्व प्राप्त झाले आहे.